FQB xakerlar uning tizimlarini buzib kirgani haqidagi ma’lumotni rad etdi

Xakerlar AQSh Federal qidiruv byurosining (FQB) tashqi elektron pochta tizimini buzib kirib, kamida 100 ming kishiga elektron xat jo‘natgani xabar qilingandi. FQBning ma’lum qilishicha, hujumchilar chindan ham FQB manzillaridan soxta elektron pochta xabarlarini yuborgan, biroq ular byuro ma’lumotlariga kirishga yoki ularni buzishga muvaffaq bo‘lmagan.

FQB ma’lumotlariga ko‘ra, noma’lum shaxslar dasturiy ta’minot sozlamalaridagi xatoliklardan foydalangan, bu esa ularga LEEP huquq-tartibot portalidan soxta elektron pochta xabarlarini yuborish imkonini bergan. LEEP — FQBning IT-infratuzilmasi bo‘lib, byuro undan shtatlar va shaharlardagi hamkasblari bilan muloqot qilish uchun foydalanadi. Bu servis FQBning ichki pochtasi bilan bog‘liq emas, deyiladi byuro xabarida.

“Hech kim FQB tarmoqlaridagi biror bir ma’lumot yoki shaxsiy ma’lumotlarga kira olmagan yoki ularni buza olmagan”, — deya ishontiriladi byuro xabarida. Shuningdek, ular kamchiliklar allaqachon bartaraf etilganini ma’lum qildi.

Avvalroq Bloomberg agentligi spam-xabarlar tarqalishini kuzatuvchi Britaniyaning Spamhaus tashkilotiga tayanib, FQBning tashqi elektron pochta tizimi buzilgani haqida xabar bergan edi. Tashkilot ma’lumotlariga ko‘ra, buzg‘unchilikdan so‘ng xakerlar “kiberhujum ehtimoli haqida ogohlantiruvchi” kamida 100 000 ta elektron xat jo‘natgan.

Spamhaus ma’lumotlariga ko‘ra, sarlavhasida “Tezkor: tizimda bosqinchi” deb yozilgan xatlarning yuborilishi yarim tunda boshlangan. Elektron xatlar AQSh Ichki xavfsizlik vazirligi nomidan yuborilgan, ularda qabul qiluvchilar kiberxavfsizlik bo‘yicha mutaxassis Vinni Troya bosqinchi ekani haqida ogohlantirilgan. 2020-yilda Troya The Dark Overlord xakerlar guruhi ustidan tekshiruv o‘tkazib, guruhdagi xakerlarning shaxsini oshkor qilgan edi.

Spamhaus’ning ta’kidlashicha, elektron pochta xabarlariga hech qanday zararli dastur biriktirilmagan bo‘lsa-da, jo‘natuvchilar qabul qiluvchilarga barcha ichki tizimlarni tekshirishni qat’iy tavsiya qilgan. Spamhaus’ning fikricha, hujumchilar Troyaning nomiga tuhmat qilishga yoki FQB telefon liniyalarini bezovta odamlarning qo‘ng‘iroqlari bilan to‘ldirib tashlashga uringan bo‘lishi mumkin.