«Беларусь чегарада зиддият юзага келишини истамайди» — Лукашенко

Беларусь чегарада зиддият юзага келишини истамайди, деди республика президенти Александр Лукашенко 15 ноябрь куни Минскдаги учрашувда.

«Биз давлатимиз чегарасида ҳеч қандай зиддият бўлишини истамаймиз. Бу биз учун мутлақо нотўғри», — дея унинг сўзларини келтирди Президент матбуот хизматига яқин бўлган «Пул Первого» Telegram канали.

Лукашенконинг фикрича, бундай қарама-қаршилик Польшага керак. «Ички ва Европа Иттифоқи билан боғлиқ муаммолар етарлича кўп – бу оломон эса давлат чегарасида отишма бошлаяпти», — деди у.

Давлат раҳбари, шунингдек, Беларусь қочқинларни ватанига қайтаришга тайёрлигини, бироқ уларнинг ўзи қайтишни истамаётганини айтди.

Польша ва Беларусь чегарасидаги вазият 8 ноябрь куни Яқин Шарқ давлатларидан келган бир неча минг муҳожир Беларусь томонидан Польша билан чегарага яқинлашиб, Европа Иттифоқига кўчиб ўтмоқчи бўлганидан кейин янада мураккаблашди. Польша ҳукумати бу воқеаларни чегарадаги инқироз бошланганидан бери энг оғир лаҳза деб баҳолади.

Польша, Литва ва Латвия сўнгги ойларда Беларусь орқали Европа Иттифоқига киришга уринаётган ноқонуний муҳожирлар оқими ортаётганини қайд этди. Европа Иттифоқи Беларусни Иттифоқ чегаралари яқинида тартибсизликлар яратишда айбламоқда. Болтиқбўйи давлатлари Беларусь ҳукуматини муҳожирлар оқимини атай уюштирганликда айблаб, буни «гибрид тажовуз» деб атамоқда. Европа Комиссияси ҳам худди шундай позицияда.

Европа Иттифоқи Беларусга қарши санкцияларни, жумладан, иқтисодий санкцияларни кучайтиришни режалаштирмоқда. «Лукашенко биздан барча санкцияларни олиб ташлашимизни талаб қилмоқда, бугун биз ўз жавобимизни берамиз, санкцияларни кучайтирамиз. Ноқонуний юк ташиш билан шуғулланаётган айрим шахсларга нисбатан қаттиқроқ курашамиз», — деди журналистларга Германия ташқи ишлар вазири Хайко Маас 15 ноябрь куни Брюсселда. Унинг сўзларига кўра, «қаттиқ иқтисодий санкцияларнинг эълон қилиниши муқаррар».

Аввалроқ Европа Иттифоқи Минск аэропортига қарши санкциялар жорий этиш имкониятини кўриб чиқаётгани хабар қилинганди.