OAVda Putinning qizi ekani taxmin qilinadigan Katerina Tixonova startaplarga sarmoya kirituvchi fond tashkil etmoqda

Rossiya prezidenti Vladimir Putinning kenja qizi deb taxmin qilinadigan, “Innopraktika” fondi bosh direktori Katerina Tixonova va uning fonddagi birinchi o‘rinbosari Natalya Popova “Texnologik investitsiyalar fondi” investitsion sheriklikni ro‘yxatdan o‘tkazish uchun ariza berdi. Bu haqda venchur kapital bozoridagi manbalarga tayanib, “RBK” xabar berdi.

Fond startaplar uchun dastlabki sarmoyalar kiritishga ixtisoslashgan bo‘lib, uni “FTI Investitsiyalarni boshqarish” kompaniyasi yuritadi, dedi agentlikning suhbatdoshlari. “Innopraktika” matbuot xizmatining qo‘shimcha qilishicha, har bir loyihaga uch million rubl (41,1 ming dollar)ga yaqin sarmoya kiritish rejalashtirilmoqda.

2021-yilning iyun oyida Sankt-Peterburg xalqaro iqtisodiy forumi sessiyasida so‘zga chiqqan Katerina Tixonova “investitsiyalar uchun fan-texnika sohasi, xususan, ilg‘or texnologiyalar alohida qiziqish uyg‘otishi mumkin”ligini ta’kidlagan.

“Innopraktika” fondi 2012-yilda Moskva davlat universiteti tomonidan tashkil etilgan. Uni Katerina Tixonova boshqargan. Tixonova hozirda Moskva davlat universiteti qoshidagi Murakkab tizimlarni matematik tadqiqot qilish instituti direktorining o‘rinbosari lavozimida ishlaydi. “Innopraktika” 2015-yilda, uning Moskva davlat universitetini kengaytirish bo‘yicha ko‘p milliard dollarlik loyihada ishtirok etayotgani ma’lum bo‘lgach, keng tanildi.

Ma’lumot uchun, bir qator Rossiya va xalqaro ommaviy axborot vositalari, jumladan, Reuters va Bloomberg agentliklarining ma’lumotlariga ko‘ra, Katerina Tixonova — Vladimir Putinning kenja qizi. AQSh Moliya vazirligi ham 2018-yil 6-apreldagi rasmiy press-relizda uni Putinning qizi deb atagan. Putinning o‘zi esa xavfsizlik masalalarini bahona qilib, oilasi haqida suhbatlashishdan bir necha bor bosh tortgan.