Avstriyada koronavirus bilan kasallanganlar soni ortayotgani sabab COVID-19 ga qarshi emlanganlik to‘g‘risidagi sertifikat yoki so‘nggi 180 kun ichida kasallikdan tuzalganini tasdiqlovchi hujjati yo‘q 12 yoshdan kattalar uchun lokdaun e’lon qilindi. Cheklovlar 15-noyabrdan kuchga kirib, 24-noyabrga qadar davom etadi, deb xabar beradi Meduza.
Emlanmagan fuqarolarga faqat supermarketlar, dorixona, sartaroshxona, shifokor yoki vaksinatsiya punktiga borish uchun uydan chiqishga ruxsat beriladi. Bundan tashqari, ular ish va o‘qishga borishlari, diniy muassasa va sayrga chiqishlari mumkin.
Hisob-kitoblarga ko‘ra, yangi cheklovlar aholisi 8,9 million bo‘lgan Avstriyaning qariyb ikki millioniga taalluqli. Politsiya restoranlarda, do‘kon va jamoat transportlarida aholining vaksinatsiya borasidagi sertifikatlarini tekshiradi. Qonunbuzarlik uchun 1450 yevroga qadar jarima belgilanishi mumkin.
Avstriyada koronavirusga qarshi emlanish bo‘yicha G‘arbiy Yevropadagi eng past ko‘rsatkich qayd etilmoqda. Mamlakatda aholining 65 foizi to‘liq emlangan.
Avvalroq Germaniya va Gretsiya koronavirusga qarshi emlanmaganlar uchun cheklovlarni kuchaytirgani, Nyu-Yorkda minglab o‘t o‘chiruvchilar emlanmagani sababli ishdan chetlatilgani to‘g‘risida xabar berilgandi.
Izoh (0)