Ijtimoiy tarmoqlarda 31-avgust kuni ochilgan “Yangi O‘zbekiston” bog‘idagi Mustaqillik monumenti Turkiyadan olib kelingan materiallardan qayta rekonstruksiya qilinayotgani to‘g‘risida xabarlar tarqalgandi. “Xabar.uz”ning olib borilayotgan rekonstruksiya ishlari bo‘yicha mas’ul shirkat mutaxassisi Sinan Turamanga tayanib yozishicha, Turkiyada koronavirus pandemiyasi sabab zarur mutaxassis va xomashyo mahsulotlarini o‘z vaqtida O‘zbekistonga olib kelish imkoniyati bo‘lmagan.
Ushbu monument tarixshunos olimlar, mutaxassislar, ilmiy kengash a’zolari bilan keng muhokama qilish va respublika hududlaridagi tarixiy obidalarni joyiga chiqib o‘rganish natijasida yaratilgan. Buning natijasida o‘ziga xos unikal bo‘lgan mustaqillik monumenti timsoli loyihasi paydo bo‘lgan.
“Quruvchi tashkilot va kompaniyamiz oldida ushbu monument loyihasini qisqa muddatlarda barpo qilish vazifasi yuklatildi. Ammo Turkiyada koronavirus pandemiyasi sababli belgilangan karantin cheklovlari natijasida zarur mutaxassis va xomashyo mahsulotlarini o‘z vaqtida O‘zbekistonga olib kelish imkoniyati bo‘lmadi. Natijada monumentning muhim bo‘lgan tarixiy shaxslar, davlat arboblari va hodisalarni aks etuvchi detallari to‘liq o‘rnatilmadi. Muddatning qisqaligi sababli bu ishlarni amalga oshirish Mustaqillik bayrami o‘tkazilganidan keyinga rejalashtirildi”, — deydi u.
Turamanning so‘zlariga ko‘ra, bugungi kunda, COVID-19 pandemiyasi bilan bog‘liq cheklovlar yumshatilgandan keyin hozirda ushbu ishlarni amalga oshirish imkoniyati yuzaga kelgan. Bu ta’mirlash va rekonstruksiya qilish ishlariga kompaniya tomonidan qo‘shimcha mablag‘ talab etilmaydi va kafolat sifatida amalga oshirilmoqda.
Eslatib o‘tamiz, Prezident Shavkat Mirziyoyev 31-avgust kuni “Yangi O‘zbekiston” bog‘i va Mustaqillik monumentining tantanali ochilish marosimida ishtirok etib, nutq so‘zlagandi. O‘z nutqida davlat rahbari “Yangi O‘zbekiston” bog‘iga yuqoridan qaralsa, ulkan daraxtning beshta shoxiga o‘xshashini ta’kidlagandi.
Izoh (0)