Ижтимоий тармоқларда 31 август куни очилган «Янги Ўзбекистон» боғидаги Мустақиллик монументи Туркиядан олиб келинган материаллардан қайта реконструкция қилинаётгани тўғрисида хабарлар тарқалганди. «Xabar.uz»нинг олиб борилаётган реконструкция ишлари бўйича масъул ширкат мутахассиси Синан Тураманга таяниб ёзишича, Туркияда коронавирус пандемияси сабаб зарур мутахассис ва хом ашё маҳсулотларини ўз вақтида Ўзбекистонга олиб келиш имконияти бўлмаган.
Ушбу монумент тарихшунос олимлар, мутахассислар, илмий кенгаш аъзолари билан кенг муҳокама қилиш ва республика ҳудудларидаги тарихий обидаларни жойига чиқиб ўрганиш натижасида яратилган. Бунинг натижасида ўзига хос уникал бўлган мустақиллик монументи тимсоли лойиҳаси пайдо бўлган.
«Қурувчи ташкилот ва компаниямиз олдида ушбу монумент лойиҳасини қисқа муддатларда барпо қилиш вазифаси юклатилди. Аммо Туркияда коронавирус пандемияси сабабли белгиланган карантин чекловлари натижасида зарур мутахассис ва хом ашё маҳсулотларини ўз вақтида Ўзбекистонга олиб келиш имконияти бўлмади. Натижада монументнинг муҳим бўлган тарихий шахслар, давлат арбоблари ва ҳодисаларни акс этувчи деталлари тўлиқ ўрнатилмади. Муддатнинг қисқалиги сабабли бу ишларни амалга ошириш Мустақиллик байрами ўтказилганидан кейинга режалаштирилди», — дейди у.
Тураманнинг сўзларига кўра, бугунги кунда, COVID-19 пандемияси билан боғлиқ чекловлар юмшатилгандан кейин ҳозирда ушбу ишларни амалга ошириш имконияти юзага келган. Бу таъмирлаш ва реконструкция қилиш ишларига компания томонидан қўшимча маблағ талаб этилмайди ва кафолат сифатида амалга оширилмоқда.
Эслатиб ўтамиз, Президент Шавкат Мирзиёев 31 август куни «Янги Ўзбекистон» боғи ва Мустақиллик монументининг тантанали очилиш маросимида иштирок этиб, нутқ сўзлаганди. Ўз нутқида давлат раҳбари «Янги Ўзбекистон» боғига юқоридан қаралса, улкан дарахтнинг бешта шохига ўхшашини таъкидлаганди.
Изоҳ (0)