Ichki ishlar vazirligi ijtimoiy tarmoqlarda tarqalgan sobiq IIB xodimining vazir Po‘lat Bobojonovga yuborgan videomurojaatiga munosabat bildirdi.
Ijtimoiy tarmoqlarda Quva tumani “Baynalminal” MFY profilaktika inspektori lavozimida ishlagan Nozimjon Nishonov ichki ishlar vaziri Po‘lat Bobojonov va IIV Shaxsiy xavfsizlik bosh boshqarmasi boshlig‘i Muhtor Mirzayevga videomurojaat bilan chiqdi.
Murojaat davomida u Quva tuman IIB boshlig‘i o‘rinbosari mayor Ahmadjonov profilaktika inspektorlariga nisbatan noqonuniy xatti-harakatlari yuzasidan shikoyat qilgan. Uning aytishicha, IIB boshlig‘i o‘rinbosari shaxsiy manfaatlari yo‘lida profilaktika inspektorlari uchun kunlik 55 ming so‘mlik “o‘rta fond” joriy qilgan. Shuningdek, 100 bosh qoramol uchun qurayotgan molxonasiga kerakli qurilish materiallarini profilaktika inspektorlari zimmasiga yuklagan.
Murojaatchining qayd etishicha, mayor har kuni profilaktika inspektorlariga bittadan mashinani jarima maydoniga, beshtadan mashina uchun jarima dalolatnomasi tuzishni majburiy reja qilib bergan. Bu rejani bajara olmagan profilaktika inspektorlari faqat gap eshitadi, kechqurun 00:00 da alohida “razvod”ga keladi.
Uning so‘zlariga ko‘ra, rahbarlar o‘zaro kelishgan holda xodimlarga nisbatan tadbirlar o‘tkazadi — pul orqali, pul berib kirgizish orqali. Bu tadbirlar qonunga zid bo‘lib, unda boshqa bir davlat organi qatnashmaydi yoki pullar kimyolanmaydi. Tadbirning ertasida O‘z xavfsizlik xizmati tekshiruvga keladi.
“Profilaktika inspektorlari ezilib ketyapti, ezilib. Dardini kimga aytishni bilmaydi”, — deydi murojaatchi.
Ta’kidlanishicha, Ahmadjonovning bu noqonuniy xatti-harakatlariga Quva tuman IIB boshlig‘i biror chora ko‘rmagan. Shuningdek, Quva tuman IIBda noqonuniy ravishda ichki tekshiruv va tadbirlar o‘tkazib kelingan. IIB boshlig‘i o‘rinbosari tuman hokimi o‘rinbosarini kaltaklab ham hech qanday jazosiz qolgani aytiladi.
Shaxsiy tarkib xodimlari bir necha marta mayor Ahmadjonovning noqonuniy harakatlari yuzasidan tuman IIB rahbariyatiga, viloyat IIB rahbariyatiga anonim tarzda murojat qilgan, ammo ular javobsiz qoldirilgan.
Murojaatchi video so‘nggida Ahmadjonovning harakatlariga ichki ishlar vaziri Po‘lat Bobojonov chora ko‘rishini so‘rab, so‘zlarining isboti sifatida qo‘lida audioyozuv borligini ta’kidlab o‘tgan.
Ichki ishlar vazirining matbuot kotibi Shohrux G‘iyosov mazkur holatga munosabat bildirib, Quva tumani IIB rahbariyatining noqonuniy harakatlari bo‘yicha tarqatayotgan vajlar o‘rnatilgan tartibda tekshirilib, holatga huquqiy baho berilishini ma’lum qildi.
Izoh (0)