Farg‘onada ota o‘z qizlariga tegajog‘lik qilgani aytilmoqda. Holat viloyat prokurori va IIB boshlig‘i nazoratiga olindi

Farg‘ona viloyati IIB Oltiariq tumanida istiqomat qiluvchi ayolning turmush o‘rtog‘i uni va farzandlarini uydan haydab yuborgani, erkak o‘z qizlariga tegajog‘lik qilib kelgani aytilgan videomurojaatga munosabat bildirdi.

Ijtimoiy tarmoqlarda Oltiariq tumanida istiqomat qiluvchi H.Y.ning turmush o‘rtog‘i uni va farzandlarini uyidan haydab yuborgani to‘g‘risida xabar tarqaldi. Ta’kidlanishicha, oila birga yashagan vaqtida er muntazam giyohvand vositalar iste’mol qilib, janjal ko‘targan va o‘z qizlariga tegajog‘lik qilib kelgan.

Farg‘ona viloyati IIB tomonidan mazkur xabar o‘rganilganda haqiqatan ham H.Y.ning turmush o‘rtog‘i U.Y. muqaddam Ma’muriy javobgarlik to‘g‘risidagi kodeksning 52-moddasiga (yengil tan jarohati yetkazish) asosan javobgarlikka tortilgani aniqlangan. Shuningdek, voyaga yetmagan o‘z qizini urib, tan jarohati yetkazgani uchun unga nisbatan Jinoyat kodeksining 109-moddasi (qasddan badanga yengil shikast yetkazish) 1-qismi bilan jinoyat ishi qo‘zg‘atilgani va jinoyat ishi Oltiariq tuman sudi tomonidan ko‘rib chiqilib, unga nisbatan tegishli jazo tayinlangani ma’lum bo‘lgan.

Bundan tashqari, videoxabarda keltirilganidek, U.Y. o‘z uyida giyohvand vositalarni yetishtirgani yoki iste’mol qilgani, o‘z qizlariga tegajog‘lik qilgani yuzasidan IIOga biror-bir murojaat kelib tushmagan. Ayolning aytishicha, uyidan narsalar (giyohvand vositalar — tahr.) topilgan bo‘lsa-da, uchastka inspektorlari hech qanday chora ko‘rmagan, “bosti-bosti” qilib yuborgan.

“Shu sababli xabarda keltirilgan holatlarga huquqiy baho berish maqsadida tergovga qadar tekshiruvlarga kirishildi. Uning yakuniga qadar qonuniy qaror qabul qilinadi”, — deyiladi munosabatda.

Shuningdek, videoxabarda IIOga bog‘liq holatlar yuzasidan viloyat IIB tomonidan xizmat tekshiruvi tayinlangan. Mazkur holat Farg‘ona viloyati prokurori va IIB boshlig‘i tomonidan alohida nazoratga olingan.

Avvalroq Toshkent shahar IIBB 20 yoshli yigitning buvisi tengi ayolni zo‘rlashga uringani isbotlanmaganini ma’lum qilgani, Toshkentda talabaga tegajog‘lik qilishda gumonlanayotgan “zamdekan” qizning o‘zi unga shilqimlik qilganini aytgani, Toshkent metropolitenida 13 yoshli qizga behayo harakatlar qilgan erkak bo‘yicha surishtiruv boshlangani to‘g‘risida xabar berilgandi.