JSST Turkmanistonning mamlakatda koronavirus yo‘qligi haqidagi bayonotiga shubha bildirdi

Jahon sog‘liqni saqlash tashkilotining yuqori lavozimli xodimi Turkmanistonning mamlakatda koronavirusga chalinish holatlari yo‘qligi haqidagi da’vosini shubha ostiga qo‘ydi, deb yozmoqda In Times.

JSST vakili birinchi marta Turkmaniston hukumatining mamlakatda COVID-19 infeksiyasi qayd etilmagani haqidagi bayonotlari ishonchliligiga shubha bilan qaradi.

“Virus pandemiya sifatida qariyb ikki yildan beri butun dunyo bo‘ylab tarqalmoqda. Ilmiy jihatdan u Turkmanistonda tarqalmagani dargumon”, — deydi JSSTning favqulodda vaziyatlar bo‘yicha katta xodimi Ketrin Smollvud.

Tahlilchilarning fikricha, Turkmanistonda koronavirus bo‘yicha yuritiladigan rasmiy statistikaga ishonib bo‘lmaydi.

“Buning sabablaridan biri hukumatning o‘ta repressiv, avtokratik tabiatidir. Turkmaniston rasmiylari ma’lumotlarni bosti-bosti qilish va haqiqatni oshkor qilgan odamlarni jazolash borasida uzoq tarixga ega”, — dedi Human Rights Watch tashkilotining Yevropa va Markaziy Osiyo bo‘yicha direktor o‘rinbosari Reychel Denber.

Doktor Smollvudning ta’kidlashicha, Turkmanistondagi delegatsiya “mamlakat amalga oshira oladigan o‘ta aniq harakatlar rejasini taqdim etgan, masalan, himoya niqoblaridan foydalanishni ko‘paytirish kabi”. Uning qo‘shimcha qilishicha, JSST har bir mamlakatda “turli sharoitlar, turli siyosiy voqeliklar va tavsiyalarga amal qilish uchun turli xil texnik imkoniyatlar” mavjudligini hisobga olishi kerak.

“JSST tashkilotga a’zo davlatlar bilan ixtiyoriy hamkorlik, muloqot va ishonchga tayanadi. Biz mazkur davlatlar bilan ochiq muloqotni davom ettirmoqdamiz va vaziyatdan qat’iy nazar bundan keyin ham davom ettiramiz”, — dedi Smollvud.

Turkmaniston Shimoliy Koreya singari hududida koronavirus bilan kasallanish holatlari yo‘q deb da’vo qilayotgan kam sonli davlatlardan biri. Doktor Smollvudning munosabati JSSTning Turkmaniston bayonotiga birinchi ommaviy e’tirozidir, chunki mamlakatda norasmiy manbalar COVID-19 holatlari soni ortib borayotgani haqida xabar bermoqda. Sentabr oxirida Turkmaniston fuqarolari JSSTga murojaat qilib, undan Turkmaniston hukumatini COVID-19 ni tan olishga majbur qilishni so‘ragan edi.

Avvalroq Turkmanistonda koronavirus haqida she’r yozgan bloger 5 yilga qamalgani haqida xabar berilgandi.