Portugaliya politsiyasi Janubiy Afrika Respublikasidagi (JAR) BMTning tinchlikparvar kuchlari jalb etilgani gumonlanayotgan jinoiy to‘dani fosh etdi, deb xabar beradi Tengrinews.
Portugaliya hukumati BMTning tinchlikparvar kuchlari sifatida JARga joylashtirilgan qo‘shinlardan Afrikadan noqonuniy tovarlar, jumladan, olmoslar, oltin, giyohvand moddalar va qurollarni tashishda kuryer sifatida foydalanilgani haqida xabar topgan. Shundan so‘ng harbiylarga qarshi o‘z tarixidagi eng katta ko‘lamli sud ishlaridan biri doirasida mamlakat bo‘ylab tintuv va hibslarni amalga oshirgan.
Rasmiylarning ma’lum qilishicha, 300 nafardan ortiq ofitser ishtirokida amalga oshirilgan operatsiyalar davomida o‘nlab hibslar amalga oshirilgan va harbiy obyektlar hamda uylarda 100 ga yaqin tintuvlar o‘tkazilgan. Ularning ma’lum qilishicha, operatsiyaning maqsadi “xalqaro aloqalardagi jinoiy tarmoq” bo‘lgan.
“Hozirda biz JARdagi Milliy qurolli kuchlarda ishtirok etgan ayrim askarlar olmoslar, oltin va giyohvand moddalar savdosida kuryer sifatida foydalanilgan bo‘lishi mumkinligini o‘rganyapmiz”, — deyiladi mamlakat armiya shtabi boshlig‘ining bayonotida.
Ta’kidlanishicha, huquq-tartibot organlarining ilk gumonlari 2019-yilda paydo bo‘lgan. Tergov ma’lumotlariga ko‘ra, tinchlikparvar kuchlar Yevropaga tovarlarni yetkazishda JAR va Portugaliya yo‘nalishi bo‘yicha uchgan va tekshiruvdan o‘tkazilmaydigan harbiy samolyotlardan foydalangan. Pul yuvishda esa boshqa shaxslar va soxta hisob raqamlardan foydalanilgan.
Lissabon BMT missiyasiga 2014-yildan beri tinchlikparvar kuchlarini taqdim etib keladi. Portugaliya tashqi ishlar vaziri ushbu mojaro butun portugal tinchlikparvarlari va qurolli kuchlari imijiga salbiy ta’sir ko‘rsatmasligiga umid bildirgan.
Izoh (0)