Turkmaniston Vazirlar mahkamasining a’zosi va tashqi ishlar vaziri, 61 yoshli Rashid Meredov koronavirusga chalinib, 24-avgust kuni Axal viloyatning Izgant qishlog‘idagi yuqumli kasalliklar shifoxonasiga yotqizilgan. Bu haqda “Azatlik” radiosiga tayanib, “Xronika Turkmenistana” xabar berdi.
So‘nggi marta Meredov 20-avgust kuni televideniye orqali namoyish etilgan Vazirlar mahkamasi yig‘ilishida ko‘ringan, shundan keyin u haqida hech qanday xabar bo‘lmagan.
“Azatlik” ta’kidlashicha, Vazirlar mahkamasining 20-avgustdan beri o‘tkazilgan ikkita majlisida Meredov ishtirok etmagan. Shuningdek, Turkmaniston prezidenti Gurbanguli Berdimuhamedovning O‘zbekistonga tashrifini tayyorlash bilan tashqi ishlar vaziri emas, balki bosh vazirning qishloq xo‘jaligi sohasini nazorat qiluvchi o‘rinbosari Esenmurat Orazgeldiev shug‘ullanmoqda.
Radio muharrirlari Turkmaniston Tashqi ishlar vazirligi bilan bog‘lanishga muvaffaq bo‘ldi. Vazirlik vakili ushbu ma’lumotni rad etib, Meredov o‘z ish joyida ekanini aytdi. Vakilning so‘zlariga ko‘ra, uning axborot maydonida yo‘qligi vazirning Afg‘onistondagi va dunyodagi vaziyat bilan bog‘liq ish jadvali bilan izohlanadi.
“Vazir o‘z joyida. ‘Azatlik’ uning ahvolidan xavotirda ekani bizni to‘lqinlantirdi, lekin xavotirga o‘rin yo‘q, vazir koronavirus bilan kasallanmagan. Afg‘onistondagi va umuman dunyodagi voqealar tufayli uning ish jadvali band. Ichki siyosat masalalari va bu masalalar bilan bog‘liq maslahatlashuvlar ko‘p vaqt talab etadi va ma’lum darajada tig‘izlikni keltirib chiqaradi. Yo‘q, u koronavirus bilan kasallanmagan. Xotirjam bo‘lishingiz mumkin”, — deya TIV vakili vaziyatni oydinlashtiruvchi savollarga javob berishdan bosh tortdi.
Radio manbalari Berdimuhamedovning O‘zbekistonga safari Meredov sog‘ayib ketganidan keyin amalga oshirilishini taxmin qilmoqda.
Ta’kidlash joizki, 20-avgustdan buyon Vazirlar mahkamasi o‘tkazgan oxirgi ikki yig‘ilishda Meredov bilan birga bosh vazirning xavfsizlik bo‘yicha o‘rinbosari va Davlat xavfsizlik kengashi kotibi Charimurat Amanov ham yo‘q edi. Biroq u 7-sentabrda bo‘lib o‘tgan Xavfsizlik kengashi yig‘ilishida ishtirok etdi.
Turkmaniston prezidenti Gurbanguli Berdimuhamedov mamlakatda koronavirus borligini haligacha inkor etmoqda, ammo avvalroq u epidemiologik xavfsizlikka javobgar vazirlarni ishdan bo‘shatgandi.
Mustaqil OAV xabarlariga ko‘ra, Turkmanistonda COVID-19 pandemiyasining navbatdagi avj olishi kuzatilmoqda. Ashxobodda bozorlar va kafelar qayta yopilgan, jamoat transporti dezinfeksiya qilinmoqda, politsiya niqobsiz odamlarni jarimaga tortmoqda, korxona va tashkilotlar xodimlaridan emlanganlik guvohnomasi talab qilinib, aks holda ularga ishdan bo‘shatish bilan tahdid qilinmoqda.
Shuningdek, Turkmanistonda yuqumli kasalliklarning oldini olish maqsadida maktablarda o‘quv yilini boshlash 1-oktabrga qoldirildi.