Peru mudofaa vaziri Uolter Edison Ayala Gonsales 8-noyabr kuni iste’foga chiqishini e’lon qildi. U so‘nggi haftada o‘z lavozimini tark etgan ikkinchi vazirlik rahbari, deb yozadi “TASS”.
“Men o‘z lavozimimni respublika prezidenti va Qurolli kuchlar Oliy bosh qo‘mondoni zimmasiga topshiraman, davlatimga minnatdorchilik bildiraman va vatan oldidagi burchimni nihoyasiga yetkazaman”, — deb yozdi u Twitter’da.
Mahalliy El Comercio gazetasiga ko‘ra, mudofaa vaziri bir qator yuqori martabali harbiy amaldorlar go‘yoki ularga mamlakat prezidenti Pedro Kastilyoga yaqin odamlarning lavozimini ko‘tarish uchun bosim o‘tkazilgani haqida shikoyat qilganidan so‘ng iste’foga chiqdi.
2-noyabr kuni Peru ichki ishlar vaziri Luis Barransuela pandemiya davrida Ichki ishlar vazirligining o‘zi tomonidan qo‘yilgan taqiqni buzgan holda ziyofat uyushtirganlikda ayblanib, iste’foga chiqqandi.
Oktabr boshida Peruda bosh vazir va hukumat almashtirilgan edi. Xususan, sobiq bosh vazir Gvido Bellidoning o‘rniga mamlakat Kongressining sobiq raisi Mirta Vaskes xonim yangi bosh vazir sifatida qasamyod qabul qilgan.
Avvalroq Kanadada qishloq xo‘jaligi vaziri ichkilikbozlik sabab iste’foga chiqqani, Ukrainada esa bosh vazirning ikki o‘rinbosari o‘z lavozimini tark etgani haqida xabar berilgandi.
Izoh (0)