“Biz kelgindi emasmiz. O‘z uyimizdamiz”. Ramzan Qodirov Yangi Moskvadagi mushtlashuvda kavkazliklarni ayblagan OAVni tanqid qildi

Checheniston rahbari Ramzan Qodirov Telegram’ga joylagan ikkita postida ommaviy axborot vositalarini tanqid qildi, bunga jurnalistlarning Yangi Moskvada bolasi bilan ketayotgan erkakka hujum qilish aybi bilan hibsga olingan to‘rt kishini “Shimoliy Kavkazning tub aholisi” deb atagani sabab bo‘lgan, deb yozadi Meduza

“Barcha kavkazliklar singari men ham har qanday, hatto kichik bir voqea yuzasidan bunday abadiy ayblovlardan charchadim. Bir necha kun ichida butun internetni barcha kavkazliklarning nomaqbul xatti-harakatlari haqidagi bayonotlar to‘ldirdi ”, — deb yozadi Qodirov.

Checheniston rahbarining aytishicha, OAV bir necha kun davomida Yangi Moskvadagi mushtlashuv ishtirokchilarini “Shimoliy Kavkaz federal okrugi respublikalarining tub aholisi” deb atagan, uning so‘zlariga ko‘ra, “bu axloqsiz OAVlarning birortasi ham” yolg‘on ma’lumot tarqatgani va milliy adovat qo‘zg‘agani uchun uzr so‘ramagan.

“Shuni ma’lum qilamanki, biz, Shimoliy Kavkaz aholisi (chechenlar, ingushlar, dog‘istonliklar, kabardiyaliklar, bolkarlar va boshqalar — barchasi istisnosiz!), Rossiya Federatsiyasining fuqarolarimiz, biz kelgindi emasmiz. Biz o‘z uyimizda yashayapmiz, xohlaysizmi yoki yo‘qmi, lekin har doim shunday bo‘ladi!”, — deyiladi Qodirovning postida.

Qodirov, shuningdek, RT telekanali bosh muharriri Margarita Simonyanni ham tanqid qildi, u Yangi Moskvada sodir bo‘lgan voqealarni izohlar ekan, shunday degan edi: Ushbu kelgindilar va kavkaz millatiga mansub shaxslarning barchasi mamlakatda yashash uchun ruxsatnoma olish bo‘yicha yana qattiqroq tartib joriy etilishiga qo‘yib beryapti. Checheniston rahbari Simonyanga ishora qilib, uni “kavkazlik” deb atadi va “jiddiy, nufuzli ommaviy axborot vositalarining bosh muharririga ma’lumotni tekshirib, shundan keyingina yangi mavzu bo‘yicha xulosa va PR qilish”ni taklif qildi.

Ramzan Qodirov Rossiya prezidenti ma’muriyati, Davlat dumasi, huquq himoyachilari va “mamlakat kelajagi haqida qayg‘uradigan barchaga” murojaat qilib, “internetda millionlab rossiyaliklarning milliy va diniy tuyg‘ulari ranjitilishiga” chek qo‘yishni taklif qildi. Uning so‘zlariga ko‘ra, Rossiyada “bu mavzuni buzib taliqn qilayotgan, so‘z erkinligi orqasiga yashiringan xorijiy davlatlarning agentlari bor” va maxsus xizmatlar ularni topishi kerak, aks holda “haqoratlar bo‘g‘ziga kelgan biror kishi ularni topib, o‘z sha’ni va qadr-qimmatini himoya qilgan holda jinoyat sodir etishi mumkin” .

4-noyabr kuni Yangi Moskvada to‘rt nafar erkak, ikki nafar mahalliy aholi (ulardan biri 4 yoshli o‘g‘li bilan sayr qilayotgan edi) bilan mushtlashuv sodir etdi. Mushtlashuv haqidagi xabarlar paydo bo‘lganidan so‘ng, ba’zi Rossiya OAVlari mojaroga Kavkazning tub aholisi ham aralashgani haqida xabar berdi. Masalan, “TASS” “Kavkazda tug‘ilganlar” so‘zini ishlatgan, Baza va “Gazeta.ru” mahalliy aholiga tayanib, janjalda “Shimoliy Kavkaz respublikalaridan birining tub aholisi” ishtirok etganini yozgan. Gumonlanuvchilar qo‘lga olinganidan so‘ng OAV ular Ozarbayjondan kelgan muhojirlar ekani haqida xabar tarqatdi.