«Биз келгинди эмасмиз. Ўз уйимиздамиз». Рамзан Қодиров Янги Москвадаги муштлашувда кавказликларни айблаган ОАВни танқид қилди

Чеченистон раҳбари Рамзан Қодиров Telegram’га жойлаган иккита постида оммавий ахборот воситаларини танқид қилди, бунга журналистларнинг Янги Москвада боласи билан кетаётган эркакка ҳужум қилиш айби билан ҳибсга олинган тўрт кишини «Шимолий Кавказнинг туб аҳолиси» деб атагани сабаб бўлган, деб ёзади Meduza

«Барча кавказликлар сингари мен ҳам ҳар қандай, ҳатто кичик бир воқеа юзасидан бундай абадий айбловлардан чарчадим. Бир неча кун ичида бутун интернетни барча кавказликларнинг номақбул хатти-ҳаракатлари ҳақидаги баёнотлар тўлдирди », — деб ёзади Қодиров.

Чеченистон раҳбарининг айтишича, ОАВ бир неча кун давомида Янги Москвадаги муштлашув иштирокчиларини «Шимолий Кавказ федерал округи республикаларининг туб аҳолиси» деб атаган, унинг сўзларига кўра, «бу ахлоқсиз ОАВларнинг бирортаси ҳам» ёлғон маълумот тарқатгани ва миллий адоват қўзғагани учун узр сўрамаган.

«Шуни маълум қиламанки, биз, Шимолий Кавказ аҳолиси (чеченлар, ингушлар, доғистонликлар, кабардияликлар, болкарлар ва бошқалар — барчаси истисносиз!), Россия Федерациясининг фуқароларимиз, биз келгинди эмасмиз. Биз ўз уйимизда яшаяпмиз, хоҳлайсизми ёки йўқми, лекин ҳар доим шундай бўлади!», — дейилади Қодировнинг постида.

Қодиров, шунингдек, RT телеканали бош муҳаррири Маргарита Симонянни ҳам танқид қилди, у Янги Москвада содир бўлган воқеаларни изоҳлар экан, шундай деган эди: Ушбу келгиндилар ва кавказ миллатига мансуб шахсларнинг барчаси мамлакатда яшаш учун рухсатнома олиш бўйича яна қаттиқроқ тартиб жорий этилишига қўйиб беряпти. Чеченистон раҳбари Симонянга ишора қилиб, уни «кавказлик» деб атади ва «жиддий, нуфузли оммавий ахборот воситаларининг бош муҳарририга маълумотни текшириб, шундан кейингина янги мавзу бўйича хулоса ва PR қилиш»ни таклиф қилди.

Рамзан Қодиров Россия президенти маъмурияти, Давлат думаси, ҳуқуқ ҳимоячилари ва «мамлакат келажаги ҳақида қайғурадиган барчага» мурожаат қилиб, «интернетда миллионлаб россияликларнинг миллий ва диний туйғулари ранжитилишига» чек қўйишни таклиф қилди. Унинг сўзларига кўра, Россияда «бу мавзуни бузиб талиқн қилаётган, сўз эркинлиги орқасига яширинган хорижий давлатларнинг агентлари бор» ва махсус хизматлар уларни топиши керак, акс ҳолда «ҳақоратлар бўғзига келган бирор киши уларни топиб, ўз шаъни ва қадр-қимматини ҳимоя қилган ҳолда жиноят содир этиши мумкин» .

4 ноябрь куни Янги Москвада тўрт нафар эркак, икки нафар маҳаллий аҳоли (улардан бири 4 ёшли ўғли билан сайр қилаётган эди) билан муштлашув содир этди. Муштлашув ҳақидаги хабарлар пайдо бўлганидан сўнг, баъзи Россия ОАВлари можарога Кавказнинг туб аҳолиси ҳам аралашгани ҳақида хабар берди. Масалан, «ТАСС» «Кавказда туғилганлар» сўзини ишлатган, Baza ва «Gazeta.ru» маҳаллий аҳолига таяниб, жанжалда «Шимолий Кавказ республикаларидан бирининг туб аҳолиси» иштирок этганини ёзган. Гумонланувчилар қўлга олинганидан сўнг ОАВ улар Озарбайжондан келган муҳожирлар экани ҳақида хабар тарқатди.