Самарқанд вилояти ҳокими Эркинжон Турдимов 3 нафар ҳоким ва 20 нафар ҳоким ўринбосарига қатъий огоҳлантириш ҳамда ҳайфсан интизомий жазо чораларини қўллади. Бу ҳақда вилоят ҳокимлиги ахборот хизмати «Дарё»га маълум қилди.
Президент ҳузуридаги Давлат хизматини ривожлантириш агентлиги барча вилоят, туман ва шаҳарлардаги ҳоким ва ҳоким ўринбосарлари фаолиятини энг муҳим самарадорлик кўрсаткичлари (ЭМСК, KPI) асосида баҳолаш тизимини йўлга қўйгани тўғрисида хабар берилганди.
Агентликнинг «Argos.uz» порталидаги «Рейтинг» саҳифасида 2021 йил июнь ҳолатига (2-чорак бўйича) натижадорлиги юқори ҳудудлар, ҳудудларда кўрсаткичлари энг юқори туман (шаҳар)лар, ҳудудларда кўрсаткичлари энг қуйи туман (шаҳар)лар, ҳоким ўринбосарларининг ЭМСК бўйича рейтинги, туман (шаҳар) ҳокимларининг топ-20 талиги, туман (шаҳар) ҳокимларининг қуйи 20 талиги бўйича рейтинг эълон қилинган.
Рейтинг натижаларига кўра, энг юқори кўрсаткичли вилоятлар рейтингида Навоий вилояти (87 балл) етакчилик қилмоқда. Вилоятлар орасида энг паст кўрсаткич Сурхондарёда (66 балл) қайд этилган.
Шунингдек, Самарқанд вилоятидаги Паст Дарғом, Каттақўрғон, Ургут туманлари ва Самарқанд шаҳри рейтингда энг паст натижаларни кўрсатган. Жумладан, туманлар орасида Паст Дарғом тумани вилоятда 16-ўрин, республикада 192-ўрин, Каттақўрғон тумани вилоятда 15-ўринда, республикада 185-ўринда, Ургут тумани вилоятда 14-ўринда, республикада 183-ўринда, Самарқанд шаҳри вилоятда 13-ўринда, республикада 177-ўринда қайд этилган (республика бўйича умумий рўйхатда 205 та ҳудуд бор).
2 ноябрь куни вилоят ҳокими бошчилигида ўтказилган видеоселектор йиғилишида рейтингда паст кўрсаткич қайд этган шаҳар ва туман ҳокимлари ва уларнинг ўринбосарларидан ҳисобот сўралган.
Йиғилиш якунида рейтингда паст кўрсаткич қайд этган 3 нафар ҳоким ва 20 нафар ҳоким ўринбосарига қатъий огоҳлантириш ва ҳайфсан интизомий жазоси қўлланиши белгиланган.
Эслатиб ўтамиз, Президент Шавкат Мирзиёев ҳокимлар лавозимини сайланадиган қилиш таклифи билан биринчи марта 2016 йил декабрида чиққанди. 2017 йил августида у ҳокимларни халқ томонидан сайлаш тизимини «ҳозироқ» жорий этишга тайёрлигини билдирган.2020 йилнинг сентябрь ойида давлат раҳбари Ўзбекистон ҳокимларни сайлаш тизимига ўтишини яна бир бор таъкидлаган. Шу билан бирга, ривожланиш даражаси «қониқарсиз» ҳамда «ўрта» деб баҳоланган туман ва шаҳарларда инқирозга қарши бошқарув тизими жорий этилиши маълум қилинган. Яъни, уларга раҳбарлик қилиш истагини билдирган ҳар қандай талабгор ҳудудни ривожлантириш дастурини маҳаллий кенгашларда ҳимоя қилиши мумкин. Халқ вакилларини ишонтира олган салоҳиятли кишилар бутун жамоаси билан туманга раҳбар этиб тайинланади.
Изоҳ (0)