Navoiy shahrida ikki qavatli Prezident maktabi qurilish ishlari yakunlanib, bino foydalanishga topshirildi, deb xabar bermoqda “Xalq so‘zi online”.
Maktabning o‘qituvchi va o‘quvchilardan iborat jamoasi joriy yilning may—avgust oylarida shakllantirilgan. 6 ming nafarga yaqin talabgor orasidan 144 nafar o‘quvchi, qariyb ming nafar pedagog ichidan 35 nafar o‘qituvchi ko‘p bosqichli sinovlar asosida saralangan.
“Yetmish besh milliard so‘mga yaqin mablag‘ yo‘naltirilgan maktab qurilishida ilg‘or arxitektura texnologiyalaridan foydalanilgan. Binoning pardozlash ishlarida qo‘llanilgan bo‘yoqlar rangi bolalarga ruhiy tetiklik, keyingi mashg‘ulotlarga motivatsiya bersa, qurilish materiallari tarkibi qishning sovug‘i va yozning jaziramasidan himoya qilish xossalariga ega”, — deyiladi xabarda.
Qayd etilishicha, maktabda darslar ertalab 08:30 da boshlanib, 15:30 ga qadar davom etadi. Darslar oralig‘ida odatdagi qo‘ng‘iroq o‘rniga mayin musiqa yangrab, o‘quvchilarni tanaffusga chaqiradi.
Ta’kidlanishicha, sinfxonalar har bir fan tasnifiga qarab jihozlangan. Ularga o‘rnatilgan elektron doskalarda dars jadvali, tanaffus vaqti, o‘qituvchi haqida qisqacha ma’lumot mavjud.
“Iqtidorli o‘quvchilarga dars o‘tish biz, o‘qituvchilar uchun o‘ziga xos bir imtihon. Har bir dars puxta tayyorgarlik, izlanish va alohida yondoshuvni talab etadi”, — deydi maktabning ona tili va adabiyot fani o‘qituvchisi Shoira Ibragimova.
Darslar tugagach, o‘quvchilar o‘zi tanlagan to‘garaklarda vaqt o‘tkazadi. Bu to‘garaklarda ularning sport, san’at, yetakchilik va notiqlik ko‘nikmalari, tanqidiy fikrlash, axborot izlash, tahlil qilish va qayta ishlash, olingan bilimlarni amaliyotda qo‘llash kabi qobiliyatlari shakllantiriladi.
“O‘quv jarayoni esa xorijiy ta’lim muassasalari bilan hamkorlikda ishlab chiqilgan o‘quv rejalari va dasturlari bo‘yicha ingliz tilida amalga oshiriladi va ‘STEAM — ta’lim’ (Science — tabiiy fanlar, Technology — texnologiya, Engineering — texnik ijodkorlik, Art — san’at, Mathematics — matematika) dasturi asosida olib boriladi. Ta’lim olishda o‘quvchilarning qiziqishlari, ayrim fanni tanlash va ularni o‘rganish darajasini inobatga olgan holda individual o‘quv jarayoni olib boriladi”, — degan maktabning fizika fani o‘qituvchisi Bogdan Dimitri.
Maktabda o‘quv blokidan tashqari, oshxona ham mavjud bo‘lib, bu yerda o‘quvchilar maxsus ratsion asosida ovqatlanadi. Maxsus sport maydoni va sport zali bolalarning jismoniy holatining o‘sishiga xizmat qiladi.
Prezident maktabining taqdimot marosimida Navoiy viloyati hokimi Qobil Tursunov, Prezident, ijod va ixtisoslashtirilgan maktablarni rivojlantirish agentligining rahbari Hilola Umarova ishtirok etib, maktab jamoasi va o‘quvchilarni tabriklagan.
Izoh (0)