O‘zbekistondagi ko‘prik va yo‘l o‘tkazgichlarning qanchasi ta’mirtalab va yaroqsiz holatda ekani ma’lum qilindi

O‘zbekistonda mavjud 14 534 ta ko‘prik va yo‘l o‘tkazgichning deyarli 6 mingtasi ta’mirtalab, 914 tasi yaroqsiz holatda. Bu haqda 2-noyabr kuni bo‘lib o‘tgan brifingda “O‘zyo‘linspeksiya” matbuot xizmati rahbari Komil Shamsiddinov ma’lum qildi.

“Avtomobil yo‘llaridagi sun’iy inshootlarning holati qayta xatlov o‘tkazish natijalariga ko‘ra Respublika bo‘yicha jami 14 534 ta ko‘prik va yo‘l o‘tkazgichlar mavjud bo‘lib, shundan 7668 tasi qoniqarli, 5952 tasi ta’mirtalab va 914 tasi yaroqsiz holatda ekani aniqlandi. Ta’mirtalab va yaroqsiz holdagi sun’iy inshootlarni ta’mirlash ishlarini amalga oshirish bo‘yicha qisqa muddatli manzilli ro‘yxatiga taklif kiritildi”, — degan Komil Shamsiddinov.

Shuningdek, uning aytishicha, yo‘l qurilish obyektlarida va yo‘l qurilishi materiallari ishlab chiqarishda qo‘pol ravishda qoidabuzilishlarga yo‘l qo‘ygan, davlat inspektorlari tomonidan berilgan ko‘rsatmalarni belgilangan muddatda bartaraf etmagan mansabdor shaxslarga nisbatan Ma’muriy javobgarlik to‘g‘risidagi kodeksning 99 va 147-modallari asosida tegishli choralar qo‘llangan.

Xususan, 184 ta ma’muriy bayonnoma rasmiylashtirilib, sud organlariga yuborilgan va bugungi kunda sudlar tomonidan 157 tasi bo‘yicha 192 million 18 ming so‘m undirilgan.