Навоий шаҳрида икки қаватли Президент мактаби қурилиш ишлари якунланиб, бино фойдаланишга топширилди, деб хабар бермоқда «Халқ сўзи online».
Мактабнинг ўқитувчи ва ўқувчилардан иборат жамоаси жорий йилнинг май—август ойларида шакллантирилган. 6 минг нафарга яқин талабгор орасидан 144 нафар ўқувчи, қарийб минг нафар педагог ичидан 35 нафар ўқитувчи кўп босқичли синовлар асосида сараланган.
«Етмиш беш миллиард сўмга яқин маблағ йўналтирилган мактаб қурилишида илғор архитектура технологияларидан фойдаланилган. Бинонинг пардозлаш ишларида қўлланилган бўёқлар ранги болаларга руҳий тетиклик, кейинги машғулотларга мотивация берса, қурилиш материаллари таркиби қишнинг совуғи ва ёзнинг жазирамасидан ҳимоя қилиш хоссаларига эга», — дейилади хабарда.
Қайд этилишича, мактабда дарслар эрталаб 08:30 да бошланиб, 15:30 га қадар давом этади. Дарслар оралиғида одатдаги қўнғироқ ўрнига майин мусиқа янграб, ўқувчиларни танаффусга чақиради.
Таъкидланишича, синфхоналар ҳар бир фан таснифига қараб жиҳозланган. Уларга ўрнатилган электрон доскаларда дарс жадвали, танаффус вақти, ўқитувчи ҳақида қисқача маълумот мавжуд.
«Иқтидорли ўқувчиларга дарс ўтиш биз, ўқитувчилар учун ўзига хос бир имтиҳон. Ҳар бир дарс пухта тайёргарлик, изланиш ва алоҳида ёндошувни талаб этади», — дейди мактабнинг она тили ва адабиёт фани ўқитувчиси Шоира Ибрагимова.
Дарслар тугагач, ўқувчилар ўзи танлаган тўгаракларда вақт ўтказади. Бу тўгаракларда уларнинг спорт, санъат, етакчилик ва нотиқлик кўникмалари, танқидий фикрлаш, ахборот излаш, таҳлил қилиш ва қайта ишлаш, олинган билимларни амалиётда қўллаш каби қобилиятлари шакллантирилади.
«Ўқув жараёни эса хорижий таълим муассасалари билан ҳамкорликда ишлаб чиқилган ўқув режалари ва дастурлари бўйича инглиз тилида амалга оширилади ва ‘STEAM — таълим’ (Science — табиий фанлар, Technology — технология, Engineering — техник ижодкорлик, Аrt — санъат, Mathematics — математика) дастури асосида олиб борилади. Таълим олишда ўқувчиларнинг қизиқишлари, айрим фанни танлаш ва уларни ўрганиш даражасини инобатга олган ҳолда индивидуал ўқув жараёни олиб борилади», — деган мактабнинг физика фани ўқитувчиси Богдан Димитри.
Мактабда ўқув блокидан ташқари, ошхона ҳам мавжуд бўлиб, бу ерда ўқувчилар махсус рацион асосида овқатланади. Махсус спорт майдони ва спорт зали болаларнинг жисмоний ҳолатининг ўсишига хизмат қилади.
Президент мактабининг тақдимот маросимида Навоий вилояти ҳокими Қобил Турсунов, Президент, ижод ва ихтисослаштирилган мактабларни ривожлантириш агентлигининг раҳбари Ҳилола Умарова иштирок этиб, мактаб жамоаси ва ўқувчиларни табриклаган.
Изоҳ (0)