Shimoliy Koreya yetakchisi Kim Chen In rasmiylarga mamlakatda yangi mafkura – “kimcheninizm”ni targ‘ib qilishga ko‘rsatma berdi, deb yozmoqda Daily Mail.
Gazetaning qayd etishicha, Janubiy Koreya razvedkachilari o‘tgan haftada “kimcheninizm” atamasi KXDR hukumat doiralarida allaqachon faol qo‘llanila boshlaganini aniqlagan. Shu bilan birga, Shimoliy Koreya davlat ommaviy axborot vositalari Kim Chen Inni “buyuk yetakchi” deb atashni boshlagan – avvallari bu atama faqat KXDR rahbarining bobosi va Shimoliy Koreya davlati asoschisi Kim Ir Senga nisbatan qo‘llanilgan.
Bundan tashqari, Kim Chen In Pxenyandagi barcha hukumat binolaridan bobosi va otasi Kim Chen Irning portretlarini olib tashlashni talab qilgani ma’lum bo‘ldi.
Mutaxassislarning fikricha, KXDR rahbarining bunday harakatlari unga bobosi va otasi tomonidan yaratilgan tizimning qator jihatlari, xususan, uning boshqaruvi qonuniyligini o‘zidan oldingilarga hurmat ko‘rsatish bilan bog‘lovchi pozitsiyasi yoqmasligidan dalolat beradi. Shu tariqa Kim Chen In, aftidan, ajdodlari soyasidan chiqmoqchi va yakka hokimga aylanishni istayapti, deb yozadi Daily Mail. Bu o‘z navbatida, Shimoliy Koreyaning amaldagi rahbari mamlakat siyosiy tizimidagi o‘z pozitsiyalariga juda ishonganidan dalolat berishi mumkin.
Ilgari KXDRdagi hukmron mafkurani tasvirlash uchun “kimirsenizm-kimchenirizm” atamasidan foydalanilgan – bu nom Kim Chen In va Shimoliy Koreyaning undan avvalgi rahbarlari – Kim Ir Sen va Kim Chen Ir o‘rtasidagi izchil munosabatlarga urg‘u berishga qaratilgandi.
Izoh (0)