Sudan harbiylari tomonidan hokimiyatdan chetlatilgan mamlakat bosh vaziri Abdulla Xamdok Sudanning yangi hukumatiga boshchilik qilishga rozi bo‘ldi. Bu haqda Al Arabiya telekanaliga tayanib, “TASS” xabar berdi.
Xabarga ko‘ra, Xamdok mamlakatdagi so‘nggi namoyishlar chog‘ida siyosiy sabablarga ko‘ra hibsga olinganlarning barchasi ozod etilishi sharti bilan, bosh vazir lavozimini qayta egallashga rozi bo‘lgan. Bundan tashqari, hokimiyatdan ag‘darilgan Sudan bosh vaziri mamlakatda “konstitutsiyaviy institutlar 25-oktabrgacha (u bosh vazir lavozimidan chetlatilgunga qadar) qanday faoliyat ko‘rsatgan bo‘lsa yana shunday shaklda tiklanishi kerakligini” ta’kidlamoqda.
Telekanalga ko‘ra, agar Xamdok bosh vazir lavozimini egallasa, u boshchiligidagi yangi Vazirlar Mahkamasi “siyosiy mustaqil mutaxassislardan iborat malakali hukumat”ga aylanadi.
Shu bilan birga, Xamdokning Vazirlar Mahkamasi rahbari lavozimini egallash ehtimoli bo‘yicha Sudan harbiylari bilan muzokaralari haqidagi ma’lumotlar turlicha. Sky News Arabia telekanalining xabar berishicha, sobiq bosh vazir bu talablarni muloqotni boshlash shartlari sifatida ilgari surgan. O‘z navbatida, Al Arabiya ham tomonlar o‘rtasidagi muzokaralar ijobiy davom etayotganini ma’lum qildi.
Sudanda bir necha hafta davom etgan norozilik namoyishlaridan so‘ng harbiylar 25-oktabrga o‘tar kechasi Xamdokni, shuningdek, qator yuqori martabali amaldorlar va siyosatchilarni hibsga oldi. Mamlakat rahbari general Abdul Fattoh al-Burhon oliy hokimiyat organlarini ishdan bo‘shatib, favqulodda holat e’lon qildi. Shuningdek, u konstitutsiyaviy deklaratsiyaning mamlakatdagi o‘tish davri asoslarini, shuningdek, harbiy va fuqarolik hokimiyati o‘rtasidagi munosabatlarni belgilab beruvchi qator moddalarini to‘xtatib qo‘ydi.
Mavzuga doir:
Izoh (0)