Ким Чен Ин отаси ва бобосининг портретларини Пхеньяндаги давлат идораларидан йўқотишни буюрди. КХДРда янги «кимченинизм» мафкураси тарғиб қилинмоқда

Шимолий Корея етакчиси Ким Чен Ин расмийларга мамлакатда янги мафкура – «кимченинизм»ни тарғиб қилишга кўрсатма берди, деб ёзмоқда Daily Mail.

Газетанинг қайд этишича, Жанубий Корея разведкачилари ўтган ҳафтада «кимченинизм» атамаси КХДР ҳукумат доираларида аллақачон фаол қўлланила бошлаганини аниқлаган. Шу билан бирга, Шимолий Корея давлат оммавий ахборот воситалари Ким Чен Инни «буюк етакчи» деб аташни бошлаган – авваллари бу атама фақат КХДР раҳбарининг бобоси ва Шимолий Корея давлати асосчиси Ким Ир Сенга нисбатан қўлланилган.

Бундан ташқари, Ким Чен Ин Пхеньяндаги барча ҳукумат биноларидан бобоси ва отаси Ким Чен Ирнинг портретларини олиб ташлашни талаб қилгани маълум бўлди.

Мутахассисларнинг фикрича, КХДР раҳбарининг бундай ҳаракатлари унга бобоси ва отаси томонидан яратилган тизимнинг қатор жиҳатлари, хусусан, унинг бошқаруви қонунийлигини ўзидан олдингиларга ҳурмат кўрсатиш билан боғловчи позицияси ёқмаслигидан далолат беради. Шу тариқа Ким Чен Ин, афтидан, аждодлари соясидан чиқмоқчи ва якка ҳокимга айланишни истаяпти, деб ёзади Daily Mail. Бу ўз навбатида, Шимолий Кореянинг амалдаги раҳбари мамлакат сиёсий тизимидаги ўз позицияларига жуда ишонганидан далолат бериши мумкин.

Илгари КХДРдаги ҳукмрон мафкурани тасвирлаш учун «кимирсенизм-кимчениризм» атамасидан фойдаланилган – бу ном Ким Чен Ин ва Шимолий Кореянинг ундан аввалги раҳбарлари – Ким Ир Сен ва Ким Чен Ир ўртасидаги изчил муносабатларга урғу беришга қаратилганди.