Davlat bojxona qo‘mitasi Kontrabandaga qarshi kurashish va bojxona auditi bosh boshqarmasi hamda DXX xodimlari tomonidan Toshkent shahrida kuchli ta’sir qiluvchi noqonuniy dori vositalari aylanmasiga qarshi tezkor tadbirlar o‘tkazilmoqda. Bu haqda qo‘mita matbuot xizmati “Daryo”ga ma’lum qildi.
Xususan, Chilonzor tumani hududida to‘xtab turgan, fuqaro Q.J. boshqaruvidagi Lacetti rusumli avtoulov belgilangan tartibda ko‘zdan kechirilganida mashinaning old yo‘lovchi o‘rindig‘i pastki qismida tegishli hujjatlari bo‘lmagan, xorijda ishlab chiqarilgan 300 dona “Tropikamid” nomli kuchli ta’sir qiluvchi dori vositalari borligi aniqlangan.
Shundan so‘ng tezkor tadbir davom ettirilgan holda fuqaro Q.J.ning vaqtincha yashab kelayotgan Sergeli tumanida joylashgan xonadoni ham belgilangan tartibda ko‘zdan kechirilgan. Ko‘zdan kechirish jarayonida xonadon ichida 1215 dona “Tropikamid” va 2100 dona “Regapen pregabalin” nomli kuchli ta’sir qiluvchi dori vositalari borligi ma’lum bo‘lgan va ashyoviy dalil sifatida olib qo‘yilgan.
Bundan tashqari, huquqni muhofaza qiluvchi idora vakillari bilan hamkorlikda o‘tkazilgan tadbir davomida Chilonzor tumani hududidagi mehmonxonalarning birida fuqaro A.A.ga biriktirilgan xona xolislar ishtirokida ko‘zdan kechirilgan.
Natijada unga tegishli ikkita sumkada jami 4530 dona kapsulada kuchli ta’sir qiluvchi dori vositalariga o‘xshash moddalar borligi aniqlangan. Ekspertiza xulosasiga ko‘ra, daliliy ashyo sifatida rasmiylashtirilib olingan mazkur dori vositasi tarkibida sof og‘irligi 45,3 gramm zaleplon nomli kuchli ta’sir qiluvchi modda mavjudligi ma’lum bo‘lgan.
Yuqoridagi barcha holatlar yuzasidan bojxona organlari tomonidan tergovga qadar tekshiruv harakatlari olib borilib, Jinoyat kodeksining tegishli moddalari bilan jinoyat ishi qo‘zg‘atilgan.
Avvalroq DXX Toshkentda psixotrop dori vositalarining noqonuniy savdosi bilan shug‘ullangan shaxslarni ushlagani to‘g‘risida xabar berilgandi.
Izoh (0)