Abdulaziz Komilov O‘zbekistonda AES qurilishi bo‘yicha jamoatchilik fikri o‘rganilishini aytdi

O‘zbekiston tashqi ishlar vaziri Abdulaziz Komilov 22-oktabr kuni O‘zbekiston va Rossiya OAV vakillari uchun o‘tkazilgan matbuot anjumanida O‘zbekistonda AES qurish loyihasini amalga oshirish bo‘yicha qanday choralar ko‘rilayotgani haqida gapirdi. Bu haqda TIV matbuot xizmati xabar berdi.

Vazirning aytishicha, o‘zaro kelishuvga ko‘ra, bu masala muhokama qilinmoqda. Bugungi kunda loyihani har tomonlama va bir necha yo‘nalishda o‘rganish ishlari olib borilmoqda. U, shuningdek, AES qurilishi haqida ayrim ommaviy axborot vositalarida turli gap-so‘zlar yurgani sababli bu sof iqtisodiy loyiha ekanini alohida ta’kidlab o‘tdi.

“Yana bir bor ta’kidlaymiz — bu siyosatdan xoli, sof iqtisodiy loyiha. Shunga yarasha aniq iqtisodiy asos kerak va loyihaning iqtisodiy samaradorligi isbotlanishi kerak. Bu O‘zbekistonda muqobil energiya manbalarining jadal rivojlanishi fonida, ayniqsa, muhim ahamiyat kasb etmoqda. Mamlakatimizda, jumladan, quyosh, shamol energetikasi, gidroenergetika va boshqa energetikani rivojlantirish bo‘yicha takliflar, qolaversa, to‘g‘ridan to‘g‘ri investitsiyalar to‘plami mavjud”, — degan Abdulaziz Komilov.

Vazir, shuningdek, MAGATE normalariga muvofiq xavfsizlik masalalari haqida ham unutmaslik kerakligini ta’kidlab o‘tdi.

“Yana bir muhim, nozik masala bu — yuqori texnologiyali va keng ko‘lamli loyiha jamoatchilik e’tiboridan chetda qolishi, shaffof bo‘lmasligi mumkin emas. Shu sababli nafaqat O‘zbekiston, balki mamlakatimiz bilan chegaradosh qo‘shni davlatlar jamoatchiligining ham bu masalaga munosabatini o‘rganamiz”, — degan TIV vaziri.

“Shunday qilib, biz ushbu masalalarni o‘rganishni davom ettiramiz. Ish, albatta, davom etmoqda. Ammo hamma narsa yuqoridagi savollarga beriladigan javoblarga bog‘liq bo‘ladi. Shundan kelib chiqib loyihani amalga oshirish yoki oshirmaslik bo‘yicha yakuniy qaror qabul qilinadi”, — deya so‘zlarini yakunlagan Abdulaziz Komilov.

Eslatib o‘tamiz, 2019-yilda “Rosatom” rahbari O‘zbekistonda AES bo‘lishining iqtisodiy foydasi haqida gapirgandi. Uning aytishicha, AESga investitsiya qilingan har bir dollar mahalliy yetkazib beruvchilarga 1,9 dollar, mamlakatning yalpi ichki mahsulotiga 4,3 dollar va soliq tushumlari shaklida budjetga 1,4 dollar daromad keltirishi mumkin.

“2019—2029-yillarda O‘zbekiston Respublikada atom energetikasini rivojlantirish konsepsiyasini tasdiqlash to‘g‘risida”gi Prezident qaroriga ko‘ra, O‘zbekiston atom elektr stansiyasi qurilishini 2022-yildan erta boshlamaydi.

Hujjatga ko‘ra, mamlakatdagi ilk atom elektr stansiyasini barpo etish uch bosqichda amalga oshiriladi. Birinchi bosqich — 2019—2020-yillarda AES quriladigan joy aniqlanadi, 2020—2021-yillarda loyihaning texnik-iqtisodiy asosini ishlab chiqish rejalashtirilmoqda. 2022-yildan esa obyekt qurilishiga kirishiladi.

Rossiya dizayni asosida quriladigan ushbu AES qiymati taxminan 11 milliard dollarga baholangan.