Давлат божхона қўмитаси Контрабандага қарши курашиш ва божхона аудити бош бошқармаси ҳамда ДХХ ходимлари томонидан Тошкент шаҳрида кучли таъсир қилувчи ноқонуний дори воситалари айланмасига қарши тезкор тадбирлар ўтказилмоқда. Бу ҳақда қўмита матбуот хизмати «Дарё»га маълум қилди.
Хусусан, Чилонзор тумани ҳудудида тўхтаб турган, фуқаро Қ.Ж. бошқарувидаги Lacetti русумли автоулов белгиланган тартибда кўздан кечирилганида машинанинг олд йўловчи ўриндиғи пастки қисмида тегишли ҳужжатлари бўлмаган, хорижда ишлаб чиқарилган 300 дона «Тропикамид» номли кучли таъсир қилувчи дори воситалари борлиги аниқланган.
Шундан сўнг тезкор тадбир давом эттирилган ҳолда фуқаро Қ.Ж.нинг вақтинча яшаб келаётган Сергели туманида жойлашган хонадони ҳам белгиланган тартибда кўздан кечирилган. Кўздан кечириш жараёнида хонадон ичида 1215 дона «Тропикамид» ва 2100 дона «Регапен прегабалин» номли кучли таъсир қилувчи дори воситалари борлиги маълум бўлган ва ашёвий далил сифатида олиб қўйилган.
Бундан ташқари, ҳуқуқни муҳофаза қилувчи идора вакиллари билан ҳамкорликда ўтказилган тадбир давомида Чилонзор тумани ҳудудидаги меҳмонхоналарнинг бирида фуқаро А.А.га бириктирилган хона холислар иштирокида кўздан кечирилган.
Натижада унга тегишли иккита сумкада жами 4530 дона капсулада кучли таъсир қилувчи дори воситаларига ўхшаш моддалар борлиги аниқланган. Экспертиза хулосасига кўра, далилий ашё сифатида расмийлаштирилиб олинган мазкур дори воситаси таркибида соф оғирлиги 45,3 грамм залеплон номли кучли таъсир қилувчи модда мавжудлиги маълум бўлган.
Юқоридаги барча ҳолатлар юзасидан божхона органлари томонидан терговга қадар текширув ҳаракатлари олиб борилиб, Жиноят кодексининг тегишли моддалари билан жиноят иши қўзғатилган.
Аввалроқ ДХХ Тошкентда психотроп дори воситаларининг ноқонуний савдоси билан шуғулланган шахсларни ушлагани тўғрисида хабар берилганди.
Изоҳ (0)