Prezident Shavkat Mirziyoyev raisligida aholini sifatli uy-joy bilan ta’minlash, “Yangi O‘zbekiston” mavzelarini barpo etish hamda shaharlar, tuman markazlari hamda aholi punktlarida ekologik vaziyat va havo tozaligini yaxshilash maqsadida “Yashil makon” umummilliy loyihasini amalga oshirish videoselektor yig‘ilishi bo‘lib o‘tdi.
Prezident yig‘ilishda uy-joy mavzelarining narxlarini 2021-yilgi darajasida ushlab qolish zarurligini ta’kidladi.
Uylar narxini barqaror saqlab turish maqsadida yangi uy-joy mavzelarini ichki va tashqi infratuzilma bilan ta’minlashga budjetdan har yili 1 trillion so‘m ajratilishi ma’lum qilindi.
Tadbirkorlik jamg‘armasi tomonidan quruvchilarga Markaziy bank stavkasidan oshgan qismi 24 oy davomida qoplab beriladi. Bu maqsadlar uchun budjetdan 1 trillion so‘m yo‘naltiriladi.
Shuningdek, 2022-yili yangi mavzelarda qurilayotgan uylarning 1000 tasi ehtiyojmand oilalar va yolg‘iz ayollar uchun davlat tomonidan kafolatli sotib olinadi. Buning uchun 220 milliard so‘m mablag‘ qurilish tashkilotlariga oldindan o‘tkazib beriladi.
Bundan tashqari, sement importi uchun imtiyozlar muddati yana bir yilga uzaytiriladi. Sement ishlab chiqaruvchilarga foyda solig‘i 20 foizdan 15 foizgacha, yer qa’ridan foydalanganlik solig‘i esa 2 baravarga kamaytiriladi. Bu 1 tonna sementning ishlab chiqarish tannarxini 7 foizga qisqartirish imkonini beradi.
Bular ham uylarning narxini sezilarli tushirishga olib kelishi ta’kidlandi.
Bundan avval Toshkentda turar joy narxlari iyundan beri 5—7 foizga, O‘zbekiston bo‘ylab esa 2,3 foizga oshgani haqida xabar qilingandi.
Izoh (0)