Toshkent viloyatidagi “Oybek” chegara bojxona postida yirik miqdorda giyohvandlik vositalarining O‘zbekistonga olib kirishga bo‘lgan urinish fosh etildi. Bu haqda Davlat bojxona qo‘mitasi matbuot xizmati “Daryo”ga ma’lum qildi.
Ma’lum qilinishicha, “Oybek” chegara bojxona postiga kirib kelgan fuqaro B.U. boshqaruvidagi DAF rusumli avtomashina o‘rnatilgan tartibda bojxona ko‘rigidan o‘tkazilgan. Hujjatlarga ko‘ra, uzum ortilgan avtomashina respublika hududidan tranzit tarzida o‘tib, Rossiyaga yetib borishi lozim bo‘lgan.
Bojxonachilar inspeksion ko‘rik majmuasi orqali avtomashinani ko‘zdan kechirib, mashina chuqurlashtirilgan holda bojxona ko‘rigidan o‘tkazilishi kerakligi to‘g‘risida xulosaga kelgan. Shundan so‘ng shubha ostiga olingan yuk avtotransport vositasi tezkor tuzilmalarning maxsus kuzatuvi ostida, “Yangiyo‘l” bojxona postida o‘rnatilgan tartibda ko‘zdan kechirilgan.
Transportga ortilgan uzumlar tushirilgach, tirkamaning pol qismi ochib ko‘rilgan va u yerdagi yashirin bo‘lmalarga berkitilgan yelim idishlar aniqlangan. 141 dona yelim idishlarda, idishi bilan hisoblaganda jami 156 kilogrammga yaqin giyohvandlik vositalari borligi ma’lum bo‘lgan. Idishlardagi giyohvandlik vositalarining hidini xizmat itlari payqamasligi uchun idish qopqog‘i maxsus smola — qatron ko‘magida ishlov berilgan.
O‘tkazilgan tezkor tadbir davomida 149,76 kilogramm gashish, 4,44 kilogramm opiy va 1,52 kilogramm geroin giyohvandlik vositalari ashyoviy dalil sifatida olingan. Hozirda mazkur holat yuzasidan jinoyat ishi qo‘zg‘atilgan.
Avvalroq Rossiyada giyohvand moddalar savdosi bilan shug‘ullangan o‘zbekistonlik aka-uka 6 yilga qamalgani, DXX xodimlari qator viloyatlarda opiy va gashish savdosi bilan shug‘ullanuvchi narkokuryerlarni qo‘lga olgani, Toshkent viloyatida xonadonidagi gultuvaklarda giyohvandlik vositasi yetishtirib kelgan fuqaro ushlangani to‘g‘risida xabar berilgandi.
Izoh (0)