Англиянинг жануби-ғарбий қисмида иккита поезд тўқнашиб кетди, дея хабар беради Уилцҳир графлиги полицияси. Ҳодиса Солсбери шаҳридаги туннелда содир бўлган. Унинг оқибатида 17 киши жароҳатланган, деб ёзади BBC.
«Биз Андовер ва Солсбери орасидаги иккита поезд иштирокида темир йўл ҳалокати содир бўлган жойда турибмиз», — деди Уилцҳир графлиги полицияси Twitter’да.
Қайд этилишича, поездлардан бири туннелдаги объектга урилган, иккинчи поезд эса сигнализация муаммоси туфайли у билан тўқнашган.
BBC хабарига кўра, жабрланганларнинг ҳаммаси касалхонага етказилган, уларнинг жароҳати жиддий эмас. Воқеа жойида 50 нафар ўт ўчирувчи, шунингдек, полиция ва тез ёрдам ходимлари иш олиб бормоқда. Поездлар ҳаракати тўхтатилган.
Эслатиб ўтамиз, Чехия Республикаси ғарбидаги Милавче қишлоғи яқинида 4 август куни эрталаб иккита йўловчи поезди тўқнашиб кетганди. Ҳодисада камида икки киши ҳалок бўлган, элликка яқин одам жароҳатланган.
Аввалроқ Покистонда иккита поезд тўқнашиб, 30 киши ҳалок бўлгани, Малайзияда метро поездларининг тўқнашуви оқибатида 200 дан ортиқ киши жароҳат олгани ҳақида хабарлар берилганди.
Изоҳ (0)