Shimoliy Makedoniya bosh vaziri Zoran Zayev munitsipal saylovlarda “Makedoniya ijtimoiy-demokratlar ittifoqi” partiyasi mag‘lubiyatga uchragach, iste’fo berish bo‘yicha qaror qabul qildi. Bu haqda Reuters agentligiga tayanib, “RBK” xabar berdi.
“Hukmron partiya nomidan raqiblarimizni munitsipal saylovlarda g‘alaba qozongani bilan tabriklaymiz. Ularning natijasi sabab mas’uliyatni qabul qilaman. Bosh vazir va partiya raisi sifatida iste’fo beraman”, — deydi Zayev.
31-oktabr kuni Shimoliy Makedoniyada munitsipal hokimiyati vakillik organlarining rahbarlari va vakillik organlari saylovining ikkinchi turi bo‘lib o‘tdi. Saylov komissiyasining dastlabki ma’lumotlariga ko‘ra, 44 ta munitsipalitetda (mamlakatda ular jami 84 ta; qolgan munitsipalitetlarda nomzodlar birinchi turda 50 foizdan ortiq ovoz to‘plagan) yirik muxolif partiya “Ichki Makedoniya inqilobiy tashkiloti — Makedoniya milliy birligi demokratik partiyasi” g‘alaba qozongan.
Mamlakatda munitsipal saylovlarning birinchi turi 17-oktabr kuni bo‘lib o‘tgan. Mahalliy hukumat organi pozitsiyasi uchun qator siyosiy tashkilot va partiyalardan 350 nafar nomzod kurashgan. Respublikada ovoz berish huquqi jami 1 824 864 kishida mavjud.
Zoran Zayev Shimoliy Makedoniya hukumatini 2017-yilning mayidan beri boshqarib kelayotgandi. Zayev boshchiligidagi hukumat 2020-yilning 3-yanvarida texnik Vazirlar Mahkamasiga parlament saylovlariga tayyorgalik ko‘rish huquqini berish uchun reja asosida iste’fo bergandi. Sobiq ichki vaziri Oliver Spasovskiy rahbarlik qilgan vaqtinchalik texnik hukumat parlament saylovlari natijasi e’lon qilingunga qadar 100 kun davomida hukumatni boshqardi. Avvaliga mamlakatda parlament saylovlarini 2020-yilning oxirida o‘tkazish rejalashtirilgandi. Shimoliy Makedoniyani Yevropa Ittifoqiga qo‘shilish borasidagi muzokaralari boshlanish sanasining kechiktirilishi tufayli fuqarolar noroziligi yuzaga kelishi mumkinligi sabab muddatidan oldin saylovlar o‘tkazilgandi.
2020-yilning yozida Zayev muddatidan oldingi parlament saylovlarida g‘alaba qozonib, Shimoliy Makedoniya hukumatini yana egallagandi.
Mavzuga doir: Makedoniya dunyo xaritasidan g‘oyib bo‘ldi
Izoh (0)