Chexiya Respublikasi g‘arbidagi Milavche qishlog‘i yaqinida 4-avgust kuni ertalab ikkita yo‘lovchi poyezdi to‘qnashib ketdi, kamida ikki kishi halok bo‘ldi. Bu haqda Novinky.cz nashri xabar berdi.

Foto: Twitter

Xabarga ko‘ra, Cheshske Kubitsedan Pragaga ketayotgan Ex 351 tezyurar poyezdi Pilzen—Domajlitse yo‘nalishi bo‘ylab ketayotgan yo‘lovchi poyezdi bilan to‘qnashgan.

Denik nashrining ma’lumotlariga ko‘ra, hodisada 50 ga yaqin odam jarohatlangan. Yong‘in xavfsizligi boshqarmasi matbuot kotibi Petr Pontzarning jurnalistlarga aytishicha, yetti kishining ahvoli og‘ir, jarohat olgan yana 31 kishining hayoti xavf ostida emas.

Politsiya poyezdlar to‘qnashuvi oqibatida ikki kishi halok bo‘lganini tasdiqladi.

Foto: Twitter

Foto: Novinky.cz

Foto: Novinky.cz

Chexiya Transport vazirligining ma’lum qilishicha, poyezdlardan birining mashinisti qizil chiroqdan o‘tib ketgan. Poyezd halokatining sabablari o‘rganilmoqda. Voqea joyida o‘t o‘chiruvchilar, shifokorlar va politsiya ishlamoqda. Shuningdek, kamida uchta vertolyot jalb qilingan.

Transport vazirligi boshlig‘i va Chexiya temiryo‘llari rahbarlari voqea joyiga jo‘nab ketdi. Germaniya qutqaruvchilari chexiyalik qutqaruvchilarga yordam bermoqda.

Avvalroq Pokistonda ikkita poyezd to‘qnashib, 30 kishi halok bo‘lgani, Malayziyada metro poyezdlarining to‘qnashuvi oqibatida 200 dan ortiq kishi jarohat olgani haqida xabarlar berilgandi.