Namanganning Chust tumanida yo‘lni kesib o‘tayotgan 71 yoshli piyoda Damas urib yuborishi oqibatida vafot etdi. Bu haqda viloyat IIB matbuot xizmati xabar berdi.
Voqea 25-oktabr kuni soat 15:30 larda, tumanning “Ko‘ktosh” mahallasida yuz bergan. 1991-yilda tug‘ilgan fuqaro Damas’ni boshqarib borayotib, harakat xavfsizligini ta’minlay olmay, yo‘lni kesib o‘tayotgan piyoda — shu mahallada yashovchi 71 yoshli fuqaroni urib yuborgan.
Oqibatda piyoda chap qo‘l tirsak suyagining yopiq sinishi, bosh miya ochiq shikasti tashxisi bilan shifoxonaga yotqizilib, ko‘rsatilgan tibbiy muolajalarga qaramay 26-oktabr kuni vafot etgan.
Ushbu holat bo‘yicha Chust tuman IIB huzuridagi TB tomonidan 27-oktabr kuni Jinoyat kodeksining 266-moddasi 2-qismi bilan jinoyat ishi qo‘zg‘atilgan.
Avvalroq Namangan viloyati Uchqo‘rg‘on tumanida Nexia-3 yo‘ldan o‘tayotgan 13 yoshli bolani, To‘raqo‘rg‘on tumanida Gentra 46 yoshli ayolni urib ketgandi. Ushbu jabrlanuvchilar ham shifoxonada vafot etgan.
Izoh (0)