Наманганнинг Чуст туманида йўлни кесиб ўтаётган 71 ёшли пиёда Damas уриб юбориши оқибатида вафот этди. Бу ҳақда вилоят ИИБ матбуот хизмати хабар берди.
Воқеа 25 октябрь куни соат 15:30 ларда, туманнинг «Кўктош» маҳалласида юз берган. 1991 йилда туғилган фуқаро Damas’ни бошқариб бораётиб, ҳаракат хавфсизлигини таъминлай олмай, йўлни кесиб ўтаётган пиёда — шу маҳаллада яшовчи 71 ёшли фуқарони уриб юборган.
Оқибатда пиёда чап қўл тирсак суягининг ёпиқ синиши, бош мия очиқ шикасти ташхиси билан шифохонага ётқизилиб, кўрсатилган тиббий муолажаларга қарамай 26 октябрь куни вафот этган.
Ушбу ҳолат бўйича Чуст туман ИИБ ҳузуридаги ТБ томонидан 27 октябрь куни Жиноят кодексининг 266-моддаси 2-қисми билан жиноят иши қўзғатилган.
Аввалроқ Наманган вилояти Учқўрғон туманида Nexia-3 йўлдан ўтаётган 13 ёшли болани, Тўрақўрғон туманида Gentra 46 ёшли аёлни уриб кетганди. Ушбу жабрланувчилар ҳам шифохонада вафот этган.
Изоҳ (0)