O‘zbekiston Tabiatni muhofaza qilish xalqaro ittifoqiga a’zo bo‘ldi

O‘zbekiston Tabiatni muhofaza qilish xalqaro ittifoqi (International Union for Conservation of Nature and Natural Resources, IUCN)ga a’zo bo‘ldi, deb xabar bermoqda “Gazeta.uz” Ekologiya va atrof-muhitni muhofaza qilish davlat qo‘mitasiga tayanib.

Qayd etilishicha, O‘zbekiston ittifoq safiga qo‘shilgan 92-mamlakat va Markaziy Osiyoda birinchi davlat bo‘ldi.

“Biz O‘zbekistonning IUCN’ga a’zo bo‘lganini qayd etishdan mamnunmiz va Ekologiya va atrof-muhitni muhofaza qilish davlat qo‘mitasi va mamlakatdagi boshqa sheriklat bilan hamkorlikni kengaytirishga umid qilamiz”, — degan IUCN’ning Sharqiy Yevropa va Markaziy Osiyo bo‘yicha mintaqaviy byurosi direktori Boris Erj.

“Biz birgalikda o‘rganayotgan hamkorlikning potensial yo‘nalishlari qatoriga ekologiya siyosati, muhofaza etiladigan tabiiy hududlar milliy tarmog‘ini kengaytirish va sifatini ta’minlash, ‘Qizil ro‘yxat’ indekslarini ishlab chiqish, yerni kompleks boshqarish va ekotizimni tiklash kiradi”, — deb qayd etgan u.

Tashkilot saytida qayd etilishicha, Tabiatni muhofaza qilish xalqaro ittifoqi O‘zbekistonni tabiiy resurslardan barqaror foydalanish, jumladan, bioxilma-xillikni saqlash va ekotizimlarni tiklashda qo‘llab-quvvatlashda davom etadi, bu esa iqlim o‘zgarishi oqibatlarini yumshatish va moslashishga hissa qo‘shish barobarida milliy ekologik maqsadlarga erishishga yordam beradi.

Xabarda aytilishcha, o‘tgan hafta Ekologiya davlat qo‘mitasi raisi o‘rinbosari Jusipbek Kazbekov boshchiligidagi O‘zbekiston delegatsiyasi tashkilotning Shveysariyadagi shtab-kvartirasida bo‘lib, u yerda TMQXIning rivojlanish guruhi global direktori Enrike Lamann bilan uchrashdi. Tomonlar, jumladan, kelajakdagi qo‘shma grant loyihalarini muhokama qildi.

Ma’lumot uchun, Tabiatni muhofaza qilish xalqaro ittifoqi 1948-yilda YuNESKO tashabbusi bilan tashkil etilgan. Ittifoqqa 120 ta davlat tashkiloti va (O‘zbekiston qo‘shilishi bilan) 92 ta davlat a’zo hisoblanadi. Ittifoqda ishtirok etish O‘zbekistonga Global ekologik fond va Yashil iqlim jamg‘armasi (TMQXI ushbu tashkilotlarning akkreditatsiyalangan agentligi hisoblanadi) tomonidan ekologik loyihalar uchun grant mablag‘larini jalb qilish, shuningdek, tabiatni muhofaza qilish sohasidagi strategik hujjatlar ishlab chiqishda TMQXI xalqaro standartlarini qo‘llash imkonini beradi.