Afg‘onistonning sobiq vitse-prezidenti Amrullo Saloh “Tolibon” jangarilarini mamlakat sharqidagi Nangarhor viloyatidagi to‘y marosimida 13 kishini o‘ldirganlikda aybladi. Bu haqda uning Twitter’dagi bayonotiga tayanib, “TASS” xabar berdi.
“Tolibon’ jangarilari Nangarhordagi to‘y marosimida musiqa ovozini o‘chirish uchun 13 kishini o‘ldirdi. Biz g‘azabimizni birgina qoralash bilan ifoda eta olmaymiz. Bu rejim uzoq davom etmaydi, lekin, afsuski, u tugatilgunicha afg‘onlar unga yana (hayoti bilan) haq to‘laydi”, — deb yozdi siyosatchi o‘zining Twitter’dagi sahifasida. Bundan tashqari, Saloh Pokiston rahbariyatini “afg‘on madaniyatini yo‘q qilish” va “uni diniy aqidaparastlik bilan almashtirish” uchun “Tolibon”ni qo‘llab-quvvatlashda yana bir bor aybladi.
Afghan Voice Agency ma’lumotlariga ko‘ra, voqea 29-oktabr oqshomida Surxrud tumanida ro‘y bergan, o‘shanda “Tolibon” jangarilari to‘yda jonli musiqa yangragani uchun marosim ishtirokchilariga qarata o‘t ochgan. Agentlik manbalariga ko‘ra, otishma oqibatida kamida ikki kishi halok bo‘lgan, 10 kishi yaralangan va mahalliy shifoxonaga yetkazilgan.
“Tolibon” harakati matbuot kotibi, Afg‘oniston Muvaqqat Vazirlar Mahkamasidagi axborot va madaniyat vaziri o‘rinbosari Zabihulla Mujohidning Twitter’da yozishicha, o‘zini “Tolibon” a’zosi deb tanishtirgan uch kishi to‘y ishtirokchilariga musiqa chalgani uchun tanbeh bergan, so‘ng ularga qarata o‘t ochgan. Uning so‘zlariga ko‘ra, uch kishi halok bo‘lgan, yana bir necha mahalliy aholi jarohatlangan. “Jinoyat sodir etganlikda gumon qilingan ikki kishi allaqachon hibsga olindi va ular shariat qonunlari asosida javob beradi”, — dedi Mujohid.
Oktabr oyi boshida “Tolibon” tomonidan tashkil etilgan Ezgulikni targ‘ib qilish va illatlarni yo‘qotish vazirligi mamlakatda to‘ylarni o‘tkazish uchun qoidalar o‘rnatdi, ulardan biri marosim paytida jonli musiqa ijro etilishini taqiqlaydi.
Izoh (0)