“Tolibon” harakati jangarilari qo‘shiqchi va xalq kuylari ijrochisi Favad Andarabiyni qatl etdi. Bu haqda Times Now nashri, shuningdek, Afg‘oniston sobiq ichki ishlar vaziri Mas’ud Andarabiy ma’lum qildi, deb yozadi “RBK”.

Favad Andarabiy

Foto: Twitter / @BamiyanLove

“Andarabda ‘Tolibon’ning shafqatsizligi davom etmoqda. Bugun ular ushbu vodiy va uning aholisiga shunchaki xursandchilik baxsh etib kelayotgan folklor qo‘shiqchi Favad Andarabiyni vahshiylarcha o‘ldirdi”, — deb yozdi sobiq vazir Twitter’da.

Times Now qo‘shiqchining o‘g‘liga tayanib xabar berishicha, uning otasi “Tolibon” Afg‘onistonda musiqani taqiqlab qo‘yganidan keyin bir necha kun o‘tib otib tashlangan.

Avvalroq guruh vakili Zabihulla Mujohid The New York Times nashriga bergan intervyusida “Tolibon” Afg‘onistonda jamoat joylarida musiqa ijro etilishini taqiqlamoqchi ekani, chunki bu, ularning fikricha, islom dini qoidalariga zidligini ma’lum qilgandi.

The New York Times ma’lumotlariga ko‘ra, hozirgi paytda guruh matbuot kotibi vazifasini bajarayotgan Zabihulla Mujohid axborot va madaniyat vaziri etib tayinlanishi mumkin.

“Musiqa islomda taqiqlangan, lekin biz odamlarga bosim o‘tkazmasdan, balki ularni bunday ishlarni qilmaslikka ko‘ndirishga umid qilyapmiz”, — dedi Mujohid.