Birlashgan Arab Amirliklari rasmiylari Livandagi diplomatlarining bir qismini chaqirib olmoqchi. Bu qaror Saudiya Arabistoni bilan birdamlik sifatida qabul qilingan, deb yozadi “Korrespondent.net”.
Bundan tashqari, BAA Tashqi ishlar vazirligi fuqarolarga Livanga safar qilishdan bosh tortishni tavsiya qilmoqda.
BAA Davlat vaziri Xalif Shohin al-Mararning ta’kidlashicha, diplomatlarni olib chiqish qarori Livandagi ayrim rasmiylarning Saudiya Arabistoniga nisbatan nomaqbul munosabatini hisobga olgan holda, BAAning Saudiya Arabistoni bilan birdamligini tasdiqlaydi.
Diplomatlarni chaqirib olish to‘g‘risidagi qaror Livandagi BAA elchixonasining konsullik bo‘limi va viza xizmatiga ta’sir qilmaydi, ular faoliyatini davom ettiradi.
Eslatib o‘tamiz, Saudiya Arabistonida Livandan mahsulotlar import qilishni taqiqlagan va Livan elchisiga 48 soat ichida mamlakatni tark etishni buyurgan. Avvalroq Saudiya hukumati Livandagi elchisini konsultatsiya uchun chaqirib olgandi.
Diplomatik mojaroga Livan axborot vaziri Georg Kordaxining avgust oyida Al-Jazeera telekanaliga bergan intervyusida Yamandagi Saudiya Arabistoni boshchiligidagi koalitsiya harakatlarini bosqinchilik deb atagani sabab bo‘lgan.
MTV kanalining ma’lum qilishicha, Livan bilan diplomatik munosabatlarni Fors ko‘rfazi arab davlatlarining hamkorlik kengashiga a’zo barcha davlatlar (Saudiya Arabistonidan tashqari, Qatar, Kuvayt, BAA, Bahrayn va Ummon) uzishga tayyor.
Mavzuga doir:
- Saudiya Arabistoni va Bahrayn Livan elchilariga mamlakatdan chiqib ketishi uchun 48 soat muhlat berdi
- Turkiya prezidenti AQSh va Germaniya singari 10 ta yetakchi mamlakatlar elchilarini persona non grata deb e’lon qilishni buyurdi. Ular turkiyalik huquq himoyachisining hibsdan ozod etilishini talab qilgandi
Izoh (0)