Berdimuhamedov yangi avtotrassaning bir qismini ochib berib, unda yangi “KamAZ”ni sinovdan o‘tkazdi (foto)

29-oktabr kuni Turkmaniston prezidenti Gurbanguli Berdimuhamedov Ashxobod—Turkmanobod avtobanining Ashxobod-Tejen yo‘li uchastkasini ochib berdi. Ochilish marosimi tantanalari dasturini prezident avvalroq bo‘lib o‘tgan Vazirlar Mahkamasining majlisida tasdiqlagandi, deb yozadi “Xronika Turkmenistana”.

Turkmaniston davlat axborot agentligi ma’lumotlariga ko‘ra, yo‘l Sanoatchilar va tadbirkorlar ittifoqi a’zosi Türkmen Awtoban OAJ tomonidan qurilmoqda, 2,3 milliard dollarlik loyiha 2023-yilning dekabr oyida yakunlanishi kerak. Umumiy uzunligi 600 kilometr bo‘lgan avtoban oltita harakat chizig‘idan iborat.

Trassa Ashxobod-Toshhovuz avtomobil yo‘lining 24-kilometridagi chorrahadan boshlanadi. U yerda to‘lov markazlari va yo‘l harakati nazorati punkti qurilgan. Hammasi bo‘lib avtoban 10 ta stansiyaga xizmat ko‘rsatadi.

Gurbanguli Berdimuhamedov “Ashxobod” terminalida Ashxobod-Tejen yo‘lining 203 kilometrlik qismini ochib berdi.

“Texnik xususiyatlariga ko‘ra avtoban xalqaro standartlarga javob beradi. Magistral yo‘l bo‘ylab savdo markazlari, umumiy ovqatlanish shoxobchalari, mehmonxonalar qurildi. Yo‘l yaqinida elektron to‘lov terminallari, videokuzatuv moslamalari, radarlar, aloqa punktlari, quyosh energiyasi bilan ishlaydigan yoritish ustunlari o‘rnatildi”, — dedi prezident.

Ochilish marosimida ishtirok etgan Avstriyaning VCE Vienna Consulting Engineers ZT GmbH kompaniyasi direktori Domagoy Perkovichning aytishicha, yo‘l ISO 9001 standartiga muvofiqlik sertifikati bilan taqdirlangan.

Videoaloqa orqali so‘zga chiqqan Germaniyaning “Reyn-Vestfaliya” transport kommunikatsiyalari vazirligi maslahat bo‘limi a’zosi, Transport fanlari instituti professori Volfgang Shuls yo‘lni yuqori darajadagi xavfsizlik sertifikati bilan taqdirladi, Dornbirn shahri (Avstriya) transport kommunikatsiyalari va infratuzilmasi departamenti esa yo‘l qurilishida innovatsion yuqori texnologiyalardan foydalanilganini tasdiqlovchi sertifikatni taqdim etdi.

Keyin Gurbanguli Berdimuhamedov Yo‘l boshqaruvi markazini ko‘zdan kechirdi, so‘ng avtomobilda trassaga chiqdi va “harakatni boshlashga o‘z fotihasini berdi”. Uning ortidan yuk mashinalari va yengil mashinalar yo‘l bo‘ylab harakatlandi.

Turkmaniston axborot agentligi ma’lumotlariga ko‘ra, yo‘lning ikki tomonida san’atkorlar va Axalteke otlarini mingan chavandozlar chiqishlar qilgan, shuningdek, bozor improvizatsiya qilingan.

To‘xtagan vaqtida Gurbanguli Berdimuhamedov “KamAZ” OAJ direktorlar kengashi raisi Sergey Tkachenko bilan suhbatlashdi. Tadbirkor yangi “KamAZ” modeli — uzoq masofaga mo‘ljallangan muzlatkichli yuk mashinasi ishlab chiqarilganini ma’lum qildi. U mashinani prezidentga taqdim etib, uni yangi yo‘lda test-drayv qilishni so‘radi.

Sinovdan so‘ng Berdimuhamedov o‘z taassurotlari bilan o‘rtoqlashdi, uning so‘zlariga ko‘ra, yuk mashinasi juda qulay, haydashga oson, haydashning iqtisodiy, xavfsizlik va ekologik qoidalariga to‘la javob beradi. Shuningdek, tashqi ko‘rinishi va ichki qismi o‘zaro mutanosib. Avtomobil tezligini oshirish juda oson. Tormoz tizimi ham o‘z vazifasini yaxshi bajaradi. “Hech qanday salbiy tomonlar sezilmadi. Xuddi shu narsani ishlov berish haqida ham aytish mumkin. Mashina rul burilishlariga aniq javob beradi va yo‘l bo‘ylab yaxshi harakatlanadi”, — dedi Berdimuhamedov.