2023 йил 1 январдан норматив-ҳуқуқий ҳужжатлар лойиҳалари вазирлик, идоралар билан келишишдан олдин лингвистик экспертизадан ўтказилади. Экспертизаларни ўтказиш тартиблари Ўзбекистон ҳукуматининг 28 октябрдаги қарори билан тасдиқланди, деб хабар беради Telegram’даги «Ҳуқуқий ахборот» канали.
Лингвистик экспертиза лойиҳани ишлаб чиққан ташкилот раҳбарининг маслаҳатчиси томонидан қуйидаги талаблар асосида ўтказилади:
- жумлаларнинг соддалиги ва қисқалиги, таърифларнинг аниқлиги;
- имло, услубий, грамматик ва орфография қоидаларига мослиги;
- янги атамалар, шунингдек, соҳа атамаларининг тўғри қўлланилганлиги;
- сўз бирикмаларининг ўзаро тўғри боғланганлиги;
- баённинг тизимлилиги ва ифодали кетма-кетлиги.
Шунга кўра, лойиҳа матни қайта ишланиб, келишиш учун вазирлик ва идораларга юборилади.
Лойиҳада қуйидагиларнинг қўлланилишига йўл қўйилмайди:
- оғзаки нутқ шакллари;
- давлат тилида тенг маъноли сўзлар ва тушунчалар мавжуд бўлган тақдирда, чет тиллари атамалари;
- эскирган ҳамда кўп маънони англатадиган сўзлар ва иборалар, мажозий таққослашлар, сифатлашлар, киноялар;
- аббревиатура ва қисқартмалар (умумий қабул қилинган аббревиатура ва қисқартмалар бундан мустасно).
Изоҳ (0)