Namangan viloyati To‘raqo‘rg‘on tumanida Cobalt qarama-qarshi yo‘nalishga chiqib ketib, Damas bilan to‘qnashdi, deya xabar qilmoqda viloyat IIB axborot xizmati.
Ma’lum qilinishicha, 2021-yil 27-oktabr kuni soat 16:30 larda To‘raqo‘rg‘on tumani “Langarbobo” MFY hududida To‘raqo‘rg‘on tumanida yashovchi, 1988-yilda tug‘ilgan fuqaro Cobalt rusumli avtomashinasini ishonch qog‘ozisiz boshqarib borayotib, harakat xavfsizligini ta’minlay olmay, qarama-qarshi yo‘nalishga o‘tib ketgan.
Shu tufayli qarshisidan harakatlanib kelayotgan, To‘raqo‘rg‘on tumanida yashovchi, 1991-yilda tug‘ilgan fuqaro boshqaruvidagi Damas rusumli avtomashina bilan to‘qnashgan.
Oqibatda Damas salonida bo‘lgan yo‘lovchilar, To‘raqo‘rg‘on tumanida yashagan, 1987-yilda tug‘ilgan ayol va birga yashagan o‘g‘li olgan tan jarohati oqibatida voqea joyida vafot etgan.
Haydovchi bosh miya yopiq shikasti, qovurg‘a suyaklarining yopiq sinishi, yo‘lovchilar –To‘raqo‘rg‘on tumanda yashovchi, 1976-yilda tug‘ilgan ayol o‘ng oyoq boldir suyagining yopiq sinishi, 1992-yilda tug‘ilgan ayol bosh miya yopiq shikasti, 1992-yilda tug‘ilgan ayol bosh miya og‘ir darajada lat yeyishi, o‘ng oyoq boldir suyagining chiqishi, qorin bo‘shlig‘i yopiq shikasti, 2019-yilda tug‘ilgan qiz peshona sohasi va ko‘krak qafasi lat yeyishi, 1991-yilda tug‘ilgan ayol bosh miya yopiq shikasti, 1957-yilda tug‘ilgan ayol o‘ng oyoq boldir suyagi yopiq sinishi, 1951-yilda tug‘ilgan ayol bosh miya ochiq shikasti tashxisi bilan shifoxonaga yotqizilgan.
Ushbu holat bo‘yicha To‘raqo‘rg‘on tumani IIB huzuridagi Tergov bo‘limi tomonidan 2021-yil 27-oktabr kuni Jinoyat kodeksining 266-moddasi 3-qismi (odamlar o‘limiga sabab bo‘lgan transport boshqarish xavfsizligi qoidalarini buzish) bilan jinoyat ishi qo‘zg‘atilgan.
Izoh (0)