Наманганда Cobalt қарама-қарши йўналишдаги Damas билан тўқнашиши оқибатида она ва бола ҳалок бўлди

Наманган вилояти Тўрақўрғон туманида Cobalt қарама-қарши йўналишга чиқиб кетиб, Damas билан тўқнашди, дея хабар қилмоқда вилоят ИИБ ахборот хизмати.

Маълум қилинишича, 2021 йил 27 октябрь куни соат 16:30 ларда Тўрақўрғон тумани «Лангарбобо» МФЙ ҳудудида Тўрақўрғон туманида яшовчи, 1988 йилда туғилган фуқаро Cobalt русумли автомашинасини ишонч қоғозисиз бошқариб бораётиб, ҳаракат хавфсизлигини таъминлай олмай, қарама-қарши йўналишга ўтиб кетган.

Шу туфайли қаршисидан ҳаракатланиб келаётган, Тўрақўрғон туманида яшовчи, 1991 йилда туғилган фуқаро бошқарувидаги Damas русумли автомашина билан тўқнашган.

Оқибатда Damas салонида бўлган йўловчилар, Тўрақўрғон туманида яшаган, 1987 йилда туғилган аёл ва бирга яшаган ўғли олган тан жароҳати оқибатида воқеа жойида вафот этган.

Ҳайдовчи бош мия ёпиқ шикасти, қовурға суякларининг ёпиқ синиши, йўловчилар –Тўрақўрғон туманда яшовчи, 1976 йилда туғилган аёл ўнг оёқ болдир суягининг ёпиқ синиши, 1992 йилда туғилган аёл бош мия ёпиқ шикасти, 1992 йилда туғилган аёл бош мия оғир даражада лат ейиши, ўнг оёқ болдир суягининг чиқиши, қорин бўшлиғи ёпиқ шикасти, 2019 йилда туғилган қиз пешона соҳаси ва кўкрак қафаси лат ейиши, 1991 йилда туғилган аёл бош мия ёпиқ шикасти, 1957 йилда туғилган аёл ўнг оёқ болдир суяги ёпиқ синиши, 1951 йилда туғилган аёл бош мия очиқ шикасти ташхиси билан шифохонага ётқизилган.

Ушбу ҳолат бўйича Тўрақўрғон тумани ИИБ ҳузуридаги Тергов бўлими томонидан 2021 йил 27 октябрь куни Жиноят кодексининг 266-моддаси 3-қисми (одамлар ўлимига сабаб бўлган транспорт бошқариш хавфсизлиги қоидаларини бузиш) билан жиноят иши қўзғатилган.