АҚШ президенти Жо Байден администрацияси мамлакатнинг собиқ президенти Дональд Трампнинг миграция сиёсати оқибатида АҚШнинг жанубий чегарасини кесиб ўтиб, оиласидан ажралган мигрантларга компенсация тўлаш имкониятини кўриб чиқмоқда. The Wall Street Journal’нинг ёзишича, тўловларнинг умумий миқдори 1 миллиард доллардан ортиши мумкин, деб хабар беради «ТАСС».
Нашр маълумотларига кўра, компенсация тўлови режаси билан АҚШ Адлия вазирлиги, Ички хавфсизлик вазирлиги ва Соғлиқни сақлаш ва ижтимоий хизматлар вазирлиги шуғулланмоқда. Таъкидланишича, жабр кўрган оиланинг ҳар бир аъзосига шароитига қараб 450 минг долларгача тўланиши, Америка ҳукумати ушбу мақсадларга жами 1 миллиард доллардан ортиқ маблағ йўналтириши мумкин. Айни вақтда 940 га яқин мигрантларнинг оиласи етказилган зарарни қоблаб берилиши бўйича даъво киритган.
Даъво киритган оилалардан бирининг манфаатини ҳимоя қилаётган «Америка фуқаролик эркинлиги ҳимояси иттифоқи» инсон ҳуқуқларини ҳимоя қилиш ташкилотининг қўшимча қилишича, Трампнинг сиёсати оқибатида қочоқларнинг 5,5 мингга яқин фарзандлари ота-онасидан ажралган.
АҚШнинг 45-президенти иммиграция қонунларини бузувчиларга нисбатан «нол инсонийлик» деб аталувчи сиёсатга амал қилди. У иммигрантларни текширишнинг янги жараёнларини жорий этиш орқали уларнинг сонини чеклаш ва қабул қилинадиган қочоқларни сонини қисқартириш тарафдори эди. Унинг сиёсати доирасида АҚШнинг жанубий чегараларини кесиб ўтган оилаларнинг кўплаб болалари ота-онасидан ажралган. 2021 йилнинг январида Жо Байден АҚШ президенти лавозимига киришиб, «янги иммиграцион сиёсат»ни эълон қилди, мазкур йўналишдаги қонунчиликни енгиллаштирди ва бошпана изловчиларни Мексикага юбориш дастурини тугатди. Шундан сўнг, Қўшма Штатларга киришни истовчи мигрантлар оқими сезиларли даражада ошган ва айни вақтда 200 мингдан ортиқни ташкил этади — бу XXI аср бошларидаги максимумга тенг.
Эслатиб ўтамиз, 2021 йилнинг май ойида Байден ўтган 2021-молиявий йилда қочқинларни қабул қилиш чегарасини 62,5 минг кишига оширганди, ундан аввалги президент Дональд Трамп даврида ушбу квота 1980 йилдан буён энг кам — 15 минг киши учун белгиланганди. Февраль ойида Байден чет элдан қочқинларни қабул қилиш квотасини 2022-молия йилида 125 минг кишига ошириш ниятида эканини маълум қилди.
Изоҳ (0)