Shimoliy Koreya, aftidan, Xitoy bilan temiryo‘l aloqalarini tiklashga tayyorlanmoqda. Bu haqda Janubiy Koreyaning Birlashish vazirligiga tayanib, Yonhap xabar berdi.
Vazirlik vakili Chxa Duk Chxulning aytishicha, KXDRning Xitoy bilan chegaradosh hududlarida savdoni qayta tiklashga tayyorgarlik ko‘rilayotganini ko‘rsatuvchi alomatlar mavjud. Vakil o‘rinbosarining so‘zlariga ko‘ra, xususan, u yerda karantin obyektlari qurilmoqda.
2020-yil yanvar oyining oxiridan beri koronavirus sababli KXDR chegaralari xorijliklar va ularning fuqarolari uchun butunlay yopiq. Rasmiy ma’lumotlarga ko‘ra, pandemiya boshlanganidan buyon KXDRda birorta ham COVID-19 infeksiyasiga chalinish holati aniqlanmagan.
Oktabr oyining birinchi haftasi uchun taqdim etilgan JSST hisobotida aytilishicha, jami 40 700 nafar shimoliy koreyalik koronavirus uchun sinovdan o‘tkazilgan, ammo “2021-yil 23-sentabr holatiga ko‘ra, KXDRda COVID-19 holatlari qayd etilmagan”.
4-oktabr kuni Shimoliy Koreya Janubiy Koreya bilan aloqa kanallarining barchasi tiklanishini ma’lum qildi. Ma’lum bo‘lishicha, bu tashabbus dastlab Shimoliy Koreya rahbari Kim Chen In tomonidan ilgari surilgan. Janubiy Koreya esa uni qo‘llab-quvvatlagan.
Iyul oyida Janubiy Koreya prezidenti Mun Chje In va KXDR yetakchisi Kim Chen In Seul va Pxenyan o‘rtasida to‘g‘ridan to‘g‘ri aloqa liniyasini qayta tiklashga kelishib olgandi.
Izoh (0)