Afg‘onistonda “Tolibon” hokimiyatga kelganidan buyon jurnalistlarga qarshi 30 dan ortiq hujum qayd etildi

Afg‘onistonda “Tolibon” harakati hokimiyatni qo‘lga kiritganidan beri jurnalistlarga nisbatan 30 dan ortiq zo‘ravonlik holati qayd etilgan. Bu haqda Afg‘oniston Jurnalistlari milliy ittifoqi rahbari Masrur Lufti ma’lum qildi, deb yozadi TOLOnews.

Luftining so‘zlariga ko‘ra, 90 foiz hollarda jurnalistlar “Tolibon” tazyiqiga uchragan. Ittifoq a’zolarining aksariyati “Tolibon” tomonidan faoliyatiga taqiq qo‘yilgan afg‘on ommaviy axborot vositalari xodimlarining holidan xavotir bildirdi, shuningdek, “Tolibon”ning muntazam cheklovlari tufayli ma’lumotlardan foydalanishda qiyinchiliklar yuzaga kelayotganini qayd etdi. Ular “Tolibon” hukumati rasmiylarini jurnalistlar xavfsizligini ta’minlashga chaqirdi.

Afg‘oniston Ichki ishlar vazirligi matbuot kotibi Sayid Xostining ishontirib aytishicha, “Tolibon” jurnalistlar xavfsizligini ta’minlashga harakat qilmoqda, bir qator hollarda ularga nisbatan noqonuniy xatti-harakatlar sodir etgan shaxslar hibsga olingan.

15-avgust kuni “Tolibon” Afg‘onistonni egallab olgach, matbuot va ayollar uchun o‘z shartlarini e’lon qildi. Unga ko‘ra, “Tolibon” hukmronligi davrida jurnalistlar hodisalarni tanqid qilishi mumkin bo‘ladi. Shu bilan birga BMT avgustda Afg‘onistonning “Tolibon” tomonidan egallab olingan hududlarida ayollar, huquq himoyachilari va jurnalistlarning ommaviy o‘ldirilishi holatlari haqida ma’lum qilgandi.

Avgust oxirida Afg‘onistonlik jurnalistlar BMTga maktub yo‘llab ularning xavfsizligini ta’minlashga chaqirdi.