Шимолий Корея, афтидан, Хитой билан темир йўл алоқаларини тиклашга тайёрланмоқда. Бу ҳақда Жанубий Кореянинг Бирлашиш вазирлигига таяниб, Yonhap хабар берди.
Вазирлик вакили Чха Дук Чхулнинг айтишича, КХДРнинг Хитой билан чегарадош ҳудудларида савдони қайта тиклашга тайёргарлик кўрилаётганини кўрсатувчи аломатлар мавжуд. Вакил ўринбосарининг сўзларига кўра, хусусан, у ерда карантин объектлари қурилмоқда.
2020 йил январь ойининг охиридан бери коронавирус сабабли КХДР чегаралари хорижликлар ва уларнинг фуқаролари учун бутунлай ёпиқ. Расмий маълумотларга кўра, пандемия бошланганидан буён КХДРда бирорта ҳам COVID-19 инфекциясига чалиниш ҳолати аниқланмаган.
Октябрь ойининг биринчи ҳафтаси учун тақдим этилган ЖССТ ҳисоботида айтилишича, жами 40 700 нафар шимолий кореялик коронавирус учун синовдан ўтказилган, аммо «2021 йил 23 сентябрь ҳолатига кўра, КХДРда COVID-19 ҳолатлари қайд этилмаган».
4 октябрь куни Шимолий Корея Жанубий Корея билан алоқа каналларининг барчаси тикланишини маълум қилди. Маълум бўлишича, бу ташаббус дастлаб Шимолий Корея раҳбари Ким Чен Ин томонидан илгари сурилган. Жанубий Корея эса уни қўллаб-қувватлаган.
Июль ойида Жанубий Корея президенти Мун Чже Ин ва КХДР етакчиси Ким Чен Ин Сеул ва Пхеньян ўртасида тўғридан-тўғри алоқа линиясини қайта тиклашга келишиб олганди.
Изоҳ (0)