Markaziy saylov komissiyasi matbuot markazida O‘zbekiston prezidenti saylovi xalqaro kuzatuv natijalarining dastlabki sarhisobi bo‘lib o‘tdi.
Qayd etilishicha, Markaziy saylov komissiyasi tomonidan jami 971 nafar xalqaro kuzatuvchi akkreditatsiyadan o‘tkazildi. Xususan, YeXHT Parlament Assambleyasi, Demokratik institutlar va inson huquqlari bo‘yicha byurosi, Yevropa Kengashi Parlament Assambleyasi, Shanxay hamkorlik tashkiloti, Mustaqil Davlatlar Hamdo‘stligi va MDH Parlamentlararo Assambleyasi, Turkiy tilli davlatlar hamkorlik kengashi, Turkiy Kengash Parlament Assambleyasi, Islom hamkorlik tashkiloti kabi 18 ta xalqaro tashkilotdan 631 nafar hamda 45 ta xorijiy davlatdan 340 nafar xalqaro kuzatuvchi ishtirok etdi.
Tadbir ishtirokchilarining umumiy fikriga ko‘ra, xalqaro kuzatuvchilar missiyalari uchun zarur shart-sharoitlar yaratilgani saylovga tayyorgarlik ko‘rish va uni o‘tkazish bo‘yicha samarali monitoring olib borish imkonini berdi.
MDHning saylovdagi missiyasi rahbari, MDH Ijrochi kotibi Sergey Lebedev ta’kidlashicha, saylovlar O‘zbekiston Konstitutsiyasi va Saylov kodeksi talablariga to‘liq mos holda, raqobatbardosh, erkin, ochiq va oshkora, demokratik saylovlarni o‘tkazishning umume’tirof etilgan tamoyillariga javob beradi.“O‘zbekistondagi saylovlarning ajralib turgan jihati qora piar va manfaatlar to‘qnashuvining yo‘qligi bo‘lib qolmoqda, bu esa mamlakatdagi saylov jarayonining G‘arb mamlakatlaridagi saylovlardan ijobiy farqlanib turishini ko‘rsatadi”, — deydi Lebedev.
ShHT kuzatuvchilar missiyasi rahbari, ShHT bosh kotibi o‘rinbosari Y.Ashimov O‘zbekistonda prezident saylovi milliy qonunchilik talablari va xalqaro majburiyatlarga javob bergani, erkin, qonuniy va demokratik ruhda o‘tganini alohida ta’kidladi. Mazkur saylovlarda ovoz berish natijalarini shubha ostiga qo‘yadigan qonunbuzilish holatlari kuzatilmadi. Shuningdek, u zamonaviy kommunikatsiya va axborot texnologiyalarining tatbiq qilingani natijasida saylov jarayoni takomillashtirilganini alohida qayd etdi.
Turkiy tilli davlatlar hamkorlik kengashi (TTDHK, Turkiy kengash) Kuzatuvchilar missiyasi rahbari O.Kojamanning ta’kidlashicha, O‘zbekiston prezidenti saylovi ochiq, oshkora va O‘zbekiston milliy qonunchiligiga amal qilgan holda, shuningdek, xalqaro standartlar, normalar va talablarga muvofiq o‘tdi.
Izoh (0)