AQSh Davlat departamenti 25-oktabr kuni O‘zbekistonda bo‘lib o‘tgan prezidentlik saylovlari natijalari bo‘yicha bayonot berdi, deb xabar beradi “Gazeta.uz”.
Bayonotda aytilishicha, AQSh “O‘zbekiston xalqining 24-oktabr kuni bo‘lib o‘tadigan prezidentlik saylovlarida ovoz berish huquqidan foydalanishini qo‘llab-quvvatlaydi”.
Davlat departamenti Yevropada xavfsizlik va hamkorlik tashkilotining Demokratik institutlar va inson huquqlari bo‘yicha byurosi missiyasining ovoz berish tinch o‘tgani va saylovchilarning yuqori faolligi bilan tavsiflangani haqidagi kuzatuviga qo‘shilgan. Shu qatori, Qo‘shma Shtatlar YeXHT missiyasining ayrim masalalar bo‘yicha “tashvishlariga sherik” ekani ta’kidlangan.
Davlat departamenti O‘zbekiston hukumatining YeXHT DIIHB kuzatuv missiyasi bilan hamkorligini ma’qullagan va YeXHTning saylovlar, fuqarolik va siyosiy huquqlarni ta’minlash bo‘yicha tavsiyalarini amalga oshirishga chaqirgan.
“Biz O‘zbekiston hukumati bilan ushbu va boshqa ko‘plab ikki tomonlama va mintaqaviy ahamiyatga molik masalalar bo‘yicha hamkorlikni davom ettirish tarafdorimiz”, — deyiladi bayonotda.
Avvalroq YeXHTning maxsus koordinatori Reynxold Lopatka O‘zbekistondagi saylov jarayonining yaxshilanganini qayd etgandi. “Sizlar to‘g‘ri yo‘ldasizlar, lekin bu oxirgi qadam emas, navbatdagi qadamlarni ham qo‘yish kerak”, — degan edi u.
Rossiya Federal Kengashi qo‘mitasi raisi o‘rinbosari Farit Muxametshin O‘zbekistonda prezident saylovlari xalqaro standartlarga mos o‘tkazilganini ta’kidlagan edi. Uning fikriga ko‘ra, nomzodlar ilgari surgan dasturlar umuman olganda “o‘zbek xalqining kutilmalariga javob beradi”.
Izoh (0)