Шотландиянинг Глазго шаҳрида бир неча кундан кейин Бирлашган Миллатлар Ташкилоти (БМТ)нинг иқлим бўйича саммити бошланади. Айни пайтда кучли ёмғир туфайли шаҳарни сув босган, деб ёзади Sky News.
Қайд этилишича, шаҳарнинг айрим кўчалари бутунлай сув остида қолган, бу эса транспорт воситалари ҳаракатланишини қийинлаштирган. Баъзи машиналар йўлда тўхтаб қолган. Шунингдек, ёмон об-ҳаво туфайли ўнлаб поездлар ҳаракати ҳам бекор қилинган.
Аввалроқ Буюк Британия метеорология хизмати Англиянинг шимоли-ғарби ва Шотландиянинг жануби-ғарбида об-ҳавонинг сариқ даражадаги хавфини эълон қилганди.
БМТнинг Иқлим ўзгариши бўйича доиравий конвенцияси иштирокчиларининг 26-конференцияси 31 октябрдан 12 ноябргача Глазгода (Буюк Британия) бўлиб ўтади. Конференцияда жами 200 та давлатдан 30 мингдан ортиқ киши, жумладан, кўплаб давлат раҳбарлари иштирок этади. Оммавий ахборот воситаларининг таъкидлашича, бу 2015 йилги Париж иқлим конференциясидан кейинги энг йирик саммит бўлиши кутилмоқда, ўша йилги йиғилиш натижасида иқлим бўйича Париж битими ишлаб чиқилганди.
Аввалроқ олимлар дунё коронавирус пандемиясидан ҳам ёмонроқ фалокатга дуч келаётганидан огоҳлантирганди. Ердаги ҳароратнинг ошиши инсон саломатлиги учун энг жиддий муаммодир. Бу асрда Ердаги ҳарорат Цельсий бўйича 2,7—3,1 даражага кўтарилмоқда. Шунинг учун иқлим бўйича Париж битимида белгиланган меъёрдан ошиб кетмаслик жуда муҳимдир.
Изоҳ (0)