Eron yadrochi olimlari 2024-yil avgust oyida Rossiyaga to‘rt kunlik sirli tashrif bilan kelgani aniqlandi. Bu haqda jurnalistik surishtiruvga tayanib, Financial Times xabar berdi.
Delegatsiya Rossiyaga diplomatik xizmat pasportlari bilan uchib kelgan. Ularning tarkibida 43 yoshli yadro fizikasi olimi Ali Kalvand va yana to‘rt nafar xodim bo‘lgan. Jamoa a’zolaridan biri Eron Mudofaa vazirligi nazoratidagi maxfiy Mudofaa innovatsiyalari va tadqiqotlari tashkilotida ishlaydigan atom mutaxassisi edi. Olimlar tashrif davomida “Rostex” bilan bog‘liq “Texnoekspert” va “Torij” ilmiy tashkilotlarda bo‘lgani aytilmoqda.
G‘arb rasmiylariga ko‘ra, delegatsiyaning yana bir a’zosi Amir Yazdyan Eron harbiy kontrrazvedkasi xodimi bo‘lgan. Eng muhim delegat Eronning Amirkabir texnologiya universitetida faoliyat yuritayotgan neytron generatorlari bo‘yicha mutaxassis, atom olimi Sorush Mohtashamiy edi.
Kalvand 2024‑yilning may oyidan beri Rossiyada radioaktiv izotoplar — tritiy, stronsiy-90 va nikel-63 olishga qiziqib kelmoqda. Bu elementlarning barchasi yadro qurollarining portlash kuchini oshiradi. Har bir izotopning eksporti qat’iy nazorat ostida amalga oshiriladi.
Ta’kidlanishicha, Kalvand rus tilini mukammal biladi va Kiyev politexnika institutining yadro fizikasi yo‘nalishi bo‘yicha diplomiga ega. Uni Rossiyaga 78 yoshli rossiyalik olim Oleg Maslennikov taklif qilgan. Eronlik mutaxassislar yadro sinovlarida ishlatilishi mumkin bo‘lgan yuqori quvvatli rentgen trubkalari va elektron tezlatgichlarga qiziqish bildirgan.
Izoh (0)