Эрон ҳукумати Франция, Буюк Британия ва Германия вакиллари билан Эроннинг ядровий дастури бўйича Қўшма кенг қамровли ҳаракатлар режасига қайтиш бўйича музокаралар олиб боришга тайёр. Бу ҳақда PressTV телеканалига таяниб «ТАСС» хабар берди.
Телеканал маълумотларига кўра, Эрон Франция, Буюк Британия ва Германияга ўз вакилларини Теҳронга юборишини ёки бу уч давлат пойтахтларига эронлик дипломатларни юборишни таклиф қилган. Қайд этилишича, Эрон томони ҳозирги кунгача ҳеч қандай жавоб олмаган.
Эрон ташқи ишлар вазири ўринбосари Али Багерий 27 октябрь куни Брюсселда Европа Иттифоқи ташқи ишлар хизмати бош котиби ўринбосари, ядрога оид Қўшма ҳаракатлар режаси бўйича қўшма комиссия координатори Энрике Моро билан музокаралар ўтказиши кутилмоқда. 14 октябрь куни улар Теҳронда учрашиб, ядровий келишувга қайтиш муаммосини муҳокама қилганди, шунингдек, маслаҳатлашувларни Брюсселда давом эттиришга келишиб олинган.
Аввалроқ Оқ уй вакили Жейк Салливан агар Эрон ядрога оид Қўшма ҳаракатлар режасига дипломатик йўл билан қайтмаса, АҚШ бошқа чоралар кўриши мумкинлигидан огоҳлантирганди. Ундан аввал АҚШ Давлат котиби Энтони Блинкен ядровий битим бўйича қарор қабул қилиш навбати Эронда қолганини, аммо АҚШ уни узоқ кутмаслигини айтган.
«Улар (эронликлар) уч ойдан буён музокара ўтказмади. Уларда сайловлар бўлиб ўтди, янги ҳукумат тузилди, лекин улар музокараларни давом эттирмади. Демак, ҳалигача қарор қабул қилинмаган ва тўп улар томонда қолмоқда, лекин бу узоқ давом этмайди », — деди Блинкен.
Апрель ойидан буён Вена шаҳрида Эрон ва халқаро «бешлик» (Россия, Буюк Британия, Германия, Хитой ва Франция) ўртасида Эрон ядровий битимини асл шаклида тиклаш бўйича музокаралар олиб борилмоқда. Томонлар Американинг Ислом Республикасига қўйган санкцияларини бекор қилиш, ядровий соҳадаги мажбуриятларини бажариш, шунингдек, АҚШнинг битимга қайтишини муҳокама қилмоқда. Шартномага аъзо давлатлар вакиллари, шунингдек, Эрон иштирокисиз Америка элчилари билан алоҳида маслаҳатлашувлар ўтказмоқда. Дастлаб делегациялар ишни май ойининг охирида, кейин июнь ойининг бошида якунлашга умид билдирганди.
Изоҳ (0)