“O‘zbekneftgaz” AJ boshqaruvi raisi Mehriddin Abdullayev boshchiligida aksiyadorlik jamiyatining departament rahbarlari, boshqarmalar direktorlari va mutaxassislar ishtirokida “New Silk Road Oil and Gas” qo‘shma korxonasida amalga oshirilayotgan ishlar holati o‘rganildi.
2013-yildan buyon O‘zbekistonda faoliyat yuritib kelayotgan “New Silk Road Oil and Gas” MChJ qo‘shma korxonasi “O‘zbekneftgaz” AJ va Xitoyning CNODC kompaniyasi hamkorligida tashkil etilgan.
CNODC kompaniyasi Xitoyning eng yirik neft va gaz kompaniyasi bo‘lgan China National Petroleum Corporation (CNPC)ning sho‘ba korxonasi hisoblanadi. Sayyor yig‘ilishda CNODC kompaniyasining O‘zbekistondagi vakili Yuy Chjitsin hamda “New Silk Road Oil and Gas” qo‘shma korxonasining bosh direktori Yan Enbyao ham ishtirok etishdi.
“New Silk Road Oil and Gas” MChJ qo‘shma korxonasining asosiy faoliyati “Dengizko‘l”, “Xo‘jadavlat” va “Sharqiy Olot” gaz kondensat konlarining “Hojisayat” maydonini o‘zlashtirish investitsiya loyihasini amalga oshirishdan iborat.
Boshqaruv raisi dastlab qo‘shma korxona tomonidan barpo etilgan 72 kishiga mo‘ljallangan ishchilar shaharchasida bo‘lib, u yerdagi ishchilarga yaratilgan sharoit hamda ularning qish fasliga mo‘ljallangan issiq maxsus kiyimlar, yotoqxona bilan to‘la ta’minlanganlik holatini nazoratdan o‘tkazdi.
Hozirgi kunda ushbu qo‘shma korxona tomonidan 16 quduq ishlatilib kelinmoqda. “Sharqiy Olot” va “Hojisayat” oralig‘ida 29,5 kilometr, “Hojidavlat — Sharqiy Olot” oralig‘ida 7,5 kilometr uzunlikda hamda “Hojisayat” — “Dengizko‘l” oralig‘ida 47 kilometr uzunlikda gaz quvurlari yotqizilgan bo‘lib, “Dengizko‘l”, “Hojidavlat” va “Sharqiy Olot” gaz kondensati konlari, “Hojisayat” uchastkasi o‘zlashtirilmoqda.
Ushbu qo‘shma korxona yil oxirigacha 394,0 million kub metr tabiiy gaz va 2,4 ming tonna gaz kondensati ishlab chiqarishni rejalashtirgan. Ishchi guruhi neft va gaz obyektlaridagi texnologik qurilmalar, quduqlar faoliyati bilan yaqindan tanishgach, boshqaruv raisi ishtirokida tezkor yig‘ilish o‘tkazildi.
Yig‘ilishda qo‘shma korxonanining uglevodorod ishlab chiqarishning prognoz ko‘rsatkichlarining bajarilish holati, shuningdek, resurslar bazasini yanada oshirishga doir bir qator zarur chora-tadbirlar muhokama qilindi.
Shu bilan birga, yig‘ilishda neft va gaz sanoatida amalga oshirilayotgan islohotlar, hamkorlik istiqbollari muhokamasiga ham alohida e’tibor qaratildi. Xitoy tomondan yangi investitsiya bloklarida geologik-qidiruv ishlarini olib borishga qiziqish bildirildi.
Yig‘ilishda bu borada yuzaga kelayotgan mavjud muammolarni bartaraf etish bo‘yicha takliflar tayyorlash, shuningdek, qo‘shma korxona samaradorligini oshirish maqsadida tegishli ishchi guruhlari tuzildi. Shuningdek, qo‘shma korxona xodimlari va “O‘zbekneftgaz” AJ neft va gaz qazib olish boshqarmalari xodimlari o‘rtasida tajriba almashish to‘g‘risida kelishuvga erishildi.
Bundan tashqari, boshqaruv raisi tomonidan “O‘zneftgaz quduq ta’mirlash” AJ va “O‘zneftgaz burg‘ilash ishlari” MChJ bilan hamkorlikda Xitoy Xalq Respublikasining “XIBU Drilling Engineering Company Limited” kompaniyasi salohiyatini o‘rganish, shuningdek, burg‘ilash va quduqlarni qayta ta’mirlash ishlariga ularning uskunalarini jalb qilish bo‘yicha topshiriqlar berildi.
“O‘zbekneftgaz” AJ matbuot xizmati
Izoh (0)