24-oktabr kuni bo‘lib o‘tgan O‘zbekiston prezidenti saylovining natijalariga ko‘ra Shavkat Mirziyoyev prezidentlik lavozimiga qayta saylandi. Shu munosabat bilan Shavkat Mirziyoyev Toshkentdagi Humo Arena saroyida tarafdorlari qarshisida chiqish qildi.
“Har bir insonning hayotida sinovli va hayajonli damlar bo‘ladi. Hozirgi holatimni sizlarga yetkazib berolmayman. Meni qo‘llab-quvvatlaganingiz, menga ishonch bildirganingiz uchun ta’zim qilib, rahmat demoqchiman.
Xalqimizning 80 foizdan ko‘proq qismi saylovda ishtirok etgani ertangi kuniga befarq emasligidan dalolat.
Fursatdan foydalanib, MSK komissiya a’zolari, okrug, uchastka komissiya a’zolariga minnatdorligimni aytmoqchiman”, – deydi Shavkat Mirziyoyev.
Shuningdek, prezidentlikka saylangan Shavkat Mirziyoyev oxirgi bir yarim oyda saylov jarayonlarini faollik bilan yoritgan barcha OAV xodimlariga alohida rahmat aytdi.
Prezident saylovining dastlabki natijalariga ko‘ra:
- Bahrom Abduhalimov (“Adolat”) — 3,4 foiz;
- Narzullo Oblomurodov (Ekologik partiya) — 4,1 foiz;
- Alisher Qodirov (Milliy tiklanish) — 5,5 foiz;
- Maqsuda Vorisova (XDP) — 6,6 foiz;
- Shavkat Mirziyoyev (O‘zLiDeP) — 80,1 foiz ovoz to‘plagan.
Izoh (0)